استاناداعى اكىمدىك عيماراتىندا نە بولىپ جاتىر؟ بۇل سۇراققا جاۋاپتى مەملەكەتتىك مەكەمەدە قاراپايىم قىزمەت اتقارىپ جۇرگەن جۇلدىزاي ايان قىزى بەرىپ وتىر. ول "جانۇيا" وتباسى ينستيتۋتىن قولداۋ ورتالىعىندا ورىن العان باسسىزدىقتى اشكەرەلەپ، قالا باسشىلىعىنا – اكىم جەڭىس قاسىمبەك پەن ءتيىستى مينيسترلىك وكىلدەرىنە اشىق ۇندەۋ جولدادى. ايتۋىنشا، مەكەمە ىشىندەگى جەمقورلىق پەن كلاندىق باسقارۋ جۇيەسى بەلەڭ الىپ، وعان قارسى شىققان قىزمەتكەرلەر قۋدالانادى.
"جۇمىس ىستەمەيتىندەر جالاقى الىپ وتىر"
جۇلدىزاي ايان قىزىنىڭ مالىمەتىنە سۇيەنسەك، ورتالىقتا جۇمىسقا تىركەلگەنىمەن، مۇلدە كەلمەيتىن «وتىرىك قىزمەتكەرلەر» ءتىزىمى بار. بۇل "قىزمەتكەرلەردىڭ" باسىم بولىگى — ديرەكتوردىڭ تۋىستارى، بۋحگالتەردىڭ قۇربىلارى، ديرەكتور ورىنباسارىنىڭ كۇيەۋى مەن اكىمشىلىككە جاقىن ادامدار ت.ب.
جۇلدىزاي ايان قىزىنىڭ ايتۋىنشا، بۇل زاڭبۇزۋشىلىق تەك "جانۇيا" ورتالىعىمەن شەكتەلمەيدى. سول سياقتى مانساپ ورتالىعى مەن باسقا دا باسقارۋ قۇرىلىمدارىنا دا تانىس-تامىر ارقىلى كىرىپ العاندار بار. بۇل — بيۋدجەتتىك قاراجاتتىڭ اشىق تۇردە تونالۋى دەگەن ءسوز.
ال مۇنىڭ ءبارىن اشكەرەلەمەك بولعان جۇلدىزاي ايان قىزىنىڭ ءوزى ءقازىر قۋدالاۋعا ۇشىراۋدا. بۇل – مەملەكەت قىزمەتكەرىنىڭ ادال ەڭبەگى مەن ازاماتتىق ۇستانىمى ءۇشىن جازالانۋى. ءارى ادىلەتتى قوعام ورناتامىز دەگەن بيلىكتىڭ بەتىنە شىركەۋ.
اكىم جەڭىس قاسىمبەك قايدا قاراپ وتىر؟
اكىمدىك بيۋدجەتىنەن قارجىلاندىرىلاتىن، حالىققا قىزمەت كورسەتۋى ءتيىس مەكەمەلەر كلاندىق كلۋبتارعا اينالىپ بارا جاتسا، استانا اكىمى نەگە ءۇنسىز؟ قالا اكىمىنىڭ مىندەتى – قالاداعى جۇيەنى ءادىل باسقارۋ. ال قازىرگى جاعداي – "استانا – سىبايلاستىقتىڭ استاناسىنا" اينالىپ بارا جاتقانىن كورسەتىپ تۇر.
بيۋدجەت ەسەبىنەن جالاقى الىپ، جۇمىس ىستەمەيتىن "ادامداردى" تىركەۋ – ۇلتتىق رەسۋرستاردى ۇرلاۋ. بۇل – قىلمىس. مۇنداي جۇيەنى بۇركەمەلەۋ – تەك قانا اكىمدىكتىڭ ەمەس، ورتالىق بيلىكتىڭ دە بەدەلىنە نۇقسان كەلتىرەدى.
جەمقورلىقپەن كۇرەس – تەك ءسوز جۇزىندە ەمەس، ناقتى ارەكەتپەن دالەلدەنۋى كەرەك. بۇل ۇندەۋگە جاۋاپ بەرمەس بۇرىن، استانا اكىمى جەڭىس قاسىمبەك مىرزانىڭ تەك كابينەتتەگى باياندامالارمەن شەكتەلمەي، قاراپايىم قىزمەتكەرلەردىڭ دە ۋاجىنە قۇلاق اسىپ، ولاردىڭ ماسەلەسىنە تەرەڭىرەك ۇڭىلگەنى ورىندى بولار ەدى. ايتپەسە، استانانىڭ ادەمى كەلبەتى – ادىلەتسىزدىكتىڭ بوياۋىمەن جۋىلىپ، ەل سەنىمىنەن تۇبەگەيلى ايىرىلادى.
