قىتايعا جاساعان رەسمي ساپارى اياسىندا الماتى وبلىسىنىڭ اكىمى مارات سۇلتانعازييەۆ قىتايدىڭ ەڭ ءىرى لوگيستيكالىق كومپانيالارىنىڭ ءبىرى – YTO Express Co. شتاب-پاتەرىنە باردى. ساپار بارىسىندا كومپانيانىڭ نەگىزىن قالاۋشى ءارى ديرەكتورلار كەڭەسىنىڭ ءتوراعاسى يۋ ۆەيسزياومەن كەزدەسۋ ءوتتى.

YTO Express – قىتايدىڭ ەكسپرەسس جەتكىزۋ نارىعىنداعى «ۇلكەن بەستىككە» كىرەتىن كوشباسشى كومپانيالاردىڭ ءبىرى جانە حالىقارالىق لوگيستيكالىق جەلىنى بەلسەندى تۇردە دامىتىپ كەلەدى. كومپانيا اۋە، تەڭىز جانە قۇرلىق ارقىلى تاسىمالداۋ قىزمەتىن كورسەتىپ، زياتكەرلىك سۇرىپتاۋ ورتالىقتارىن باسقارادى جانە لوگيستيكا سالاسىنا ارنالعان IT-شەشىمدەر ۇسىنادى. بۇگىندە YTO الەم بويىنشا 5 100-دەن استام فيليالعا، 133 لوگيستيكالىق حابقا جانە 80 000 تەرمينالعا يەلىك ەتەدى.

اكىم وسىنداي جاھاندىق وپەراتورلارمەن ارىپتەستىكتىڭ ستراتەگيالىق ماڭىزدىلىعىن اتاپ ءوتتى، اسىرەسە الماتى وبلىسىن «ءبىر بەلدەۋ – ءبىر جول» باستاماسى اياسىندا كولىك-لوگيستيكالىق حاب رەتىندە دامىتۋ تۇرعىسىنان. بۇگىندە الماتى وبلىسى YTO كومپانياسىنىڭ جاھاندىق لوگيستيكالىق ستراتەگياسىنداعى باسىم باعىتتاردىڭ ءبىرى بولىپ وتىر. بۇل قاتاردا دۋباي، سيدنەي جانە لوس-اندجەلەس سياقتى ءىرى قالالار دا بار.

تاراپتار YTO كومپانياسىنىڭ الماتى وبلىسىنداعى قاتىسۋىن كەڭەيتۋ، بىرلەسكەن ينفراقۇرىلىمدىق جوبالاردى جۇزەگە اسىرۋ جانە يننوۆاسيالىق لوگيستيكالىق شەشىمدەردى دامىتۋ ماسەلەلەرىن تالقىلادى.

ساپار وڭىرگە جوعارى تەحنولوگيالىق ينۆەستيسيالاردى تارتۋ مەن ەكونوميكالىق سەرىكتەستىكتى نىعايتۋ جولىنداعى ماڭىزدى قادام بولدى.