الماتىدا حالىققا قىزمەت كورسەتۋ ورتالىعىنىڭ بۇرىنعى قىزمەتكەرى مەملەكەت مەنشىگىندەگى جەر تەلىمدەرىن الاياقتىق جولمەن يەمدەنگەنى ءۇشىن سوتتالدى.

اتالعان قىلمىستىق ءىستى قارجى مونيتورينگى اگەنتتىگى الماتى قالاسى بويىنشا دەپارتامەنتى جۇرگىزدى.

الماتى قالاسى اكىمدىگىنىڭ قاۋلىسىمەن ۋاقىتشا پايدالانۋ قۇقىعى نەگىزىندە "الماتى" الەۋمەتتىك-كاسىپكەرلىك كورپوراسياسىنا جۋكوۆ كوشەسىندەگى 2،3 گا جانە جاماكايەۆ كوشەسىندەگى 6،3 گا جەر تەلىمدەرى 5 جىل مەرزىمگە بەرىلگەن.

“بۇرىن "ازاماتتارعا ارنالعان ۇكىمەت" كوممەرسيالىق ەمەس اكسيونەرلىك قوعامىنىڭ قىزمەتكەرى بولىپ جۇمىس ىستەگەن ءابدىجاپاروۆ جىلجىمايتىن مۇلىكتى تىركەۋ جۇيەسىنىڭ قالاي جۇمىس ىستەيتىنىن بىلە وتىرىپ، ۋاكىلەتتى ورگاندارعا جەر تەلىمدەرىن ۋاقىتشا پايدالانۋدان باس تارتۋ تۋرالى جالعان كەلىسىمدەر مەن جەر تەلىمدەرى جەكە مەنشىككە بەرىلدى دەگەن جالعان اكىمدىك قاۋلىلارىن تاپسىرعان. الايدا ءىس جۇزىندە مۇنداي قاۋلىلار اكىمدىك تاراپىنان شىعارىلماعان”، – دەلىنگەن حابارلامادا.

وسىنىڭ ناتيجەسىندە ول اتالعان جەر تەلىمدەرىن زاڭسىز تۇردە ءوزىنىڭ "ايشا گرۋپپ" ءجشس-نىڭ اتىنا قايتا تىركەگەن. كەيىن بۇل جەر تەلىمدەرىن ءۇشىنشى تۇلعالارعا 1،3 ميلليارد تەڭگەگە ساتىپ جىبەرگەن.

سوتتىڭ سانكسياسىمەن نارىقتىق قۇنى13،6 ميلليارد تەڭگە جەر تەلىمدەرىنە تىيىم سالىندى.

سوت ۇكىمىمەن ءابدىجاپپاروۆ قىلمىستىق كودەكستىڭ 190-بابى 4-بولىگى 2-تارماعى “ءىرى مولشەردەگى الاياقتىق” بويىنشا كىنالى دەپ تانىلىپ، 7 جىل باس بوستاندىعىنان ايىرۋ جازاسىنا كەسىلدى.

جەر تەلىمدەرى مەملەكەت مەنشىگىنە قايتارىلدى، ولاردىڭ اۋماعىندا يننوۆاسيالىق حاب سالۋ جوسپارلانىپ جاتىر.