جۋرناليست، "ۋاقىت كورسەتەدى" Youtube ارناسىنىڭ جۇرگىزۋشىسى نۇرسەيىت جىلقىشىبايدىڭ توبىلعىتورى اتتى تۇلپارى سەمەي قالاسىندا وتكەن بايگەدە توپ جارىپ، جۇلدەلى بولدى. جۋرناليسكە ايماق باسشىسى بەرىك ءۋالي اۆتوكولىكتىڭ كىلتىن تابىستادى. 

بايگە اباي قۇنانباي ۇلىنىڭ 180 جىلدىق مەرەيتويىنا وراي ۇيىمداستىرىلعان بولاتىن. توپ بايگەدەن بولەك "الامان بايگەدە" پاۆلودار قالاسىنىڭ، جورعا جارىسىندا قىرعىزستاننىڭ جۇيرىگى توپ جاردى. جۇلدەگەرلەردىڭ بارلىعى كولىكتى بولدى. 

ايماق باسشىسى بەرىك ءۋالي مەرەيتويلىق ونكۇندىك اياسىندا توي تويلاۋعا ەمەس، وي ويلاۋعا، رۋحاني، زياتكەرلىك، تانىمدىق، سپورتتىق شارالارعا باسا ءمان بەرىلگەنىن ايتتى.

"جالپى 10 كۇندىك ءىس-شارالار ەلدىڭ بەرەكە-بىرلىگىنىڭ ارقاسىندا جوعارى دەڭگەيدە ءوتتى دەپ ەسەپتەيمىن. "اباي اكادەمياسى" اتتى ەنسيكلوپەديالىق پورتال اشىلدى. بىرنەشە كىتاپتىڭ تۇساۋى كەسىلدى. مىڭنان استام كوماندا قاتىسقان "اباي كۋيز" ينتەللەكتۋالدىق ويىنى وتكىزىلدى. زاعيپ جاندار مەن ناشار كورەتىن ازاماتتارعا ارنالعان كىتاپحانا ىسكە قوسىلدى. بۇگىن وزدەرىڭىز كورگەندەي، جۇلدە قورلارىنىڭ ءار ايماققا، ءتىپتى قىرعىز ەلىنە دەيىن كەتكەنى قۋانتادى. وسى رەتتە تويدىڭ جوعارى دەڭگەيدە وتۋىنە اتسالىسقان وبلىستىڭ جاناشىر ازاماتتارىنا العىس ايتامىن"، – دەدى اكىم.