سەۋل قالاسىندا Alatau Rise With Kazakhstan Forum ءوتىپ جاتىر. فورۋمنىڭ اشىلۋىنا قانات بوزىمبايەۆ قاتىسىپ، الەۋەتتى ينۆەستورلار مەن سەرىكتەستەرگە جاڭا الاتاۋ City جوباسىن تانىستىردى.

قازاقستان تاراپىنان فورۋمعا Alatau City دامىتۋ كەڭەسىنىڭ مۇشەلەرى – Caspian Group ءتوراعاسى يۋريي سحاي جانە جوبانىڭ ينۆەستيسيالىق سەرىكتەسى Alatau City Bankء-تىڭ جالعىز اكسيونەرى ۆياچەسلاۆ كيم قاتىستى.

Alatau City نەگىزگى كولىك دالىزدەرىنىڭ تورابىندا ورنالاسقان، جالپى اۋدانى 88 مىڭ گەكتاردى قۇرايدى. قالانىڭ بۇكىل اۋماعى ارنايى ەكونوميكالىق ايماقتىڭ قۇرامىنا ەنگىزىلگەن. مۇندا كورپوراتيۆتىك تابىس سالىعىنان، جەر جانە مۇلىك سالىعىنان بوساتۋ، سونداي-اق الاتاۋ قالاسى اۋماعىندا ساتىلاتىن تاۋارلارعا نولدىك مولشەرلەمەسىمەن قوسىمشا قۇن سالىعىن قولدانۋ سياقتى جەڭىلدىكتەر قاراستىرىلعان.

قىركۇيەك ايىندا پرەزيدەنتتىڭ ارنايى جارلىعىمەن الاتاۋ قالاسىنا دامۋ قارقىنى وزىق قالا دەگەن ارناۋلى مارتەبە بەرىلدى. پرەمەر-مينيستردىڭ توراعالىعىمەن قۇرىلعان الاتاۋ قالاسىن دامىتۋ كەڭەسى ستراتەگيالىق شەشىمدەر قابىلدايتىن نەگىزگى ورگان بولىپ سانالادى. وسىلايشا قالا ۇكىمەتتىڭ تىكەلەي قاراماعىندا بولادى.

Alatau City بولاشاقتا تەحنولوگيالىق كومپانيالار مەن ەكسپورتقا باعىتتالعان وندىرىستەردىڭ ورتالىعىنا اينالماق. قالا قالالىق اۋە موبيلدىگى مەن سۋتەك ەكونوميكاسى سياقتى ماقساتتى سالالار بويىنشا ىنتالاندىرۋ باعدارلامالارىن ۇسىنۋعا دايىن، بۇل باعىتتاردا قازاقستان مەن كورەيا تىعىز ارىپتەستىك ورناتا الادى.

فورۋمدا سويلەگەن سوزىندە قانات بوزىمبايەۆ ەلەكترونيكا، جاڭارتىلاتىن ەنەرگيا، مەديسينا، ءبىلىم جانە قالالىق سەرۆيستەردى سيفرلاندىرۋ سالالارىندا كورەي كومپانيالارىمەن ارىپتەستىكتى دامىتۋدىڭ ۇلكەن الەۋەتى بار ەكەنىن اتاپ ءوتتى.

«بۇگىندە كورەيانىڭ 800-دەن استام كومپانياسى قازاقستاننىڭ بارلىق وڭىرلەرىندە ەنەرگەتيكا، قۇرىلىس، قارجى، دەنساۋلىق ساقتاۋ، اۆتوكولىك جانە جوعارى تەحنولوگيالار سالالارىندا تابىستى جۇمىس ىستەۋدە. ءبىز بىرلەسكەن جوبالاردى كەڭەيتۋگە، كورەيانىڭ ونەركاسىپتىك جانە ەنەرگەتيكالىق كومپانيالارىن تارتۋعا مۇددەلىمىز. ءوزارا ءتيىمدى ىنتىماقتاستىققا اشىقپىز جانە سىزدەردى ۇلتتىق Alatau City جوباسىنا قاتىسۋعا شاقىرامىز»، — دەدى قانات بوزىمبايەۆ.

Roadshow اياسىندا قازاقستان مەن كورەيا رەسپۋبليكاسىنىڭ مەملەكەتتىك جانە ىسكەر قۇرىلىمدارى اراسىندا ءوزارا تۇسىنىستىك تۋرالى ءبىرقاتار مەموراندۋمعا قول قويىلدى. مەموراندۋمدارعا كەلەسى تاراپتار: ق ر ەنەرگەتيكا مينيسترلىگى مەن GGGI (Global Green Growth Institute)؛ ق ر كولىك مينيسترلىگى، Korea Airports Corporation (KAC) جانە AAAG؛ الماتى وبلىسىنىڭ اكىمدىگى مەن RETD كومپانياسى قول قويدى.

سونىمەن قاتار ق ر عىلىم جانە جوعارى ءبىلىم مينيسترلىگى، كورەيانىڭ عىلىم جانە تەحنولوگيالار ينستيتۋتى (KAIST) جانە Alatau City Bank اراسىندا قازاقستاندا جاڭا ۋنيۆەرسيتەت قۇرۋ جانە دامىتۋ سالاسىندا ىنتىماقتاستىق تۋرالى مەموراندۋمعا قول قويىلدى.

ءىس-ساپار بارىسىندا قانات بوزىمبايەۆ ۇلتتىق جينالىستىڭ دەپۋتاتى پاك حون گىنمەن، ۇلتتىق اسسامبلەيا مۇشەسى مەن سون گيۋمەن، ساۋدا، ونەركاسىپ جانە ەنەرگەتيكا ءمينيسترى كيم دجۋنگ كۆانمەن، كورەيانىڭ حالىقارالىق ساۋدا قاۋىمداستىعىنىڭ (KITA) ءتوراعاسى يۋن دجين سيكپەن جانە Young Business Leaders Network باسشىلىعىمەن كەلىسسوزدەر جۇرگىزدى.

تاراپتار ەكى ەل اراسىنداعى ساۋدا-ەكونوميكالىق بايلانىستاردىڭ تۇراقتى دامىپ كەلە جاتقانىن اتاپ ءوتتى. 2024 جىلى كورەيا رەسپۋبليكاسى قازاقستاننىڭ نەگىزگى ساۋدا سەرىكتەستەرى اراسىندا 10-ورىنعا، ال ينۆەستيسيالار كولەمى بويىنشا 3-ورىنعا شىقتى. تاراپتار ىنتىماقتاستىقتى ودان ءارى تەرەڭدەتۋ جانە ەكى ەلدىڭ مۇددەلەرىنە ساي جاڭا بىرلەسكەن باستامالاردى جۇزەگە اسىرۋعا نيەتتى ەكەنىن ءبىلدىردى.