ورال. قازاقپارات - سامارا قالاسىندا «اقجول» قازاق ۇلتتىق-مادەني اۆتونومياسىنىڭ 10 جىلدىعىنا ارنالعان مەرەيتويلىق شارالار ءوتىپ، وعان باتىس قازاقستان وبلىسىنىڭ دەلەگاسياسى دا قاتىسىپ قايتتى. 
مەرەكەلىك شاراعا رەسەيدىڭ جيىرماعا جۋىق ايماعىنان، سونداي-اق قازاقستاننان دۇنيەجۇزى قازاقتارى قاۋىمداستىعى ءتوراعاسىنىڭ ءبىرىنشى ورىنباسارى تالعات ماماشيەۆ باستاعان مەيماندار بارىپ، «اقجولدىقتاردىڭ» قۋانىشىن ءبولىستى. قاۋىمداستىقتىڭ قولداۋىمەن رەسەي قازاقتارىنىڭ كىشى قۇرىلتايى ءوتىپ، وندا كورشى ەلدە تۇراتىن قانداستارمەن قارىم-قاتىناستى ودان ءارى جانداندىرۋ، ولاردىڭ ۇلتتىق ءسالت-داستۇرى مەن مادەنيەتىن، انا ءتىلىن جوعالتپاي، ساقتاۋىنا قولداۋ كورسەتۋ باعىتىندا پىكىر الماسىلىپ، الداعى جوسپارلار پىسىقتالدى.

وسىدان ون جىل بۇرىن قۇرىلعان «اقجول» اۆتونومياسىنا ۇلتجاندى ازامات توقتارباي دۇيسەنبايەۆ جەتەكشىلىك ەتەدى. ون جىل ىشىندە اۆتونوميا كوپتەگەن تابىستارعا قول جەتكىزدى. قازىرگى كەزدە اتالعان ۇيىمنىڭ سامارانىڭ ون ەكى اۋدانىندا فيليالى، ءۇش ۇلتتىق ءانسامبلى بار. جىل سايىن كەزەكپەن ءار اۋداندا ناۋرىز مەيرامى كەڭىنەن تويلانىپ كەلەدى. بۇرىن انا تىلىندە سويلەۋدەن قاشقاقتايتىن قانداستارىمىز بىرتە-بىرتە ۇلت مادەنيەتى مەن ونەرىنە، ءوز تىلىنە بەت بۇردى. ت.دۇيسەنبايەۆتىڭ اتاپ وتكەنىندەي، وسى مەرزىمدە باتىس قازاقستان وبلىسى اكىمدىگى «اقجول» اۆتونومياسىنا قولدان كەلگەن كومەگىن اياعان جوق. قازاق ءتىلىن ۇيرەتۋ باعىتىندا بىرلەسكەن سەمينارلار ۇيىمداستىرىلىپ، ماماندار ىس-تاجىريبەلەرىمەن ءبولىستى. سونداي-اق، قازاق جاستارى اتاجۇرتقا كەلىپ، ءتىل سىندىرسا، مادەنيەت ماماندارى ساماراعا بارىپ، ونداعىلاردى ۇلتتىق ان-كۇي مەن بيگە ۇيرەتتى. ءتىپتى سوندا تۇراقتاپ قالعاندارى دا بار. كورشىلەس وڭىرلەردە تۇراتىن باۋىرلار انا تىلىندەگى ادەبي كىتاپتار، وقۋ-ادىستەمەلىك جيناقتارمەن دە قامتىلدى.

بۇل جولى دا ءوڭىر باسشىسى نۇرلان نوعايەۆتىڭ قولداۋىمەن بارعان باتىسقازاقستاندىقتار اتىنان  بقو ءماسليحاتىنىڭ حاتشىسى مالىك قۇلشار «اقجولدىقتاردى» قۇتتىقتاپ، يگى تىلەگىن جەتكىزدى. ال ع.قۇرمانعالييەۆ اتىنداعى وبلىستىق فيلارمونيا ارتىستەرى ءوز ونەرلەرىن كورسەتىپ، مەرەكەنىڭ شىرايىن اشا تۇسۋگە اتسالىستى.