اقتوبە. قازاقپارات - اقتوبە وبلىسىنىڭ اكىمى بەردىبەك ساپاربايەۆ جول-كولىك اپاتىندا زارداپ شەككەندەرگە كومەك كورسەتتى
وبلىس ورتالىعىنىڭ كۋرسانت تاسجولىندا 25 قىركۇيەكتە ءتورت جەڭىل ماشينانىڭ قاتىسۋىمەن جول-كولىك اپاتى بولدى. ولاردىڭ بىرىندە زاڭ ينستيتۋتىنىڭ وقىتۋشىلارى 24 جاستاعى پوليسيا مايورى جانبولات قۇلعارين مەن 27 جاستاعى پوليسيا كاپيتانى التىنبەك ءدىلىموۆ كەلە جاتتى. سوققىدان ماشينا قارسى بەتتەگى جولعا شىعىپ كەتتى. جانبولات الدىنداعى تەرەزە اينەگىنەن ۇشىپ كەتتى.

وسى كەزدە جولدا وبلىس اكىمى بەردىبەك ساپاربايەۆتىڭ كورتەجى كەلە جاتقان، ءوڭىر باسشىسى كەزەكتى جۇمىس ساپارىمەن بارا جاتقان بولاتىن. جول-كولىك وقيعاسىن  جانە اسفالتتا جاتقان ادامداردى كورىپ، وبلىس اكىمى ماشينانى توقتاتىپ، وقيعا ورنىنا كەلدى، بىردەن قۇتقارۋ قىزمەتىن شاقىردى جانە جەدەل جاردەم ماشيناسى كەلگەنشە كۇتىپ تۇردى.

زارداپ شەككەن جانبولاتتىڭ قارىنداسى التىناي قۇلعارينا بەردىبەك ماشبەكۇلىنا العىسىن جاۋدىرۋدا.

«ونى بىزگە اللا جولىقتىردى. اپاتتان كەين بىردەن جەدەل جاردەم شاقىرىلدى، ءبىراق تا ول كەشىكتى. وبلىس اكىمىنىڭ قوڭىراۋى دارىگەرلەر مەن قۇتقارۋشىلاردىڭ كەلۋىن تەزدەتتى»، - دەيدى ول.

جانبولات قۇلعارين جەدەل جاردەم اۋرۋحاناسىنىڭ نەيروحيرۋرگيا بولىمىنە باس ميىنىڭ زامقىمدانۋىمەن جانە قابىرعاسى سىنىپ ءتۇستى.

التىنبەك ءدىلىموۆتىڭ كوكباۋىرىن وتا جاساپ الىپ تاستادى. زارداپ شەگۋشىلەردىڭ ەمدەۋشى دارىگەرى وكسانا ونوپرياك ولاردىڭ بىرتە-بىرتە جازىلىپ كەلە جاتقانىن ايتادى. ال وفيسەرلەردىڭ وزدەرى ادامگەرشىلىك كومەگى ءۇشىن وبلىس اكىمىنە تىكەلەي بارىپ، وزدەرىنىڭ العىسىن بىلدىرمەك.