تاراز. قازاقپارات - قازاق حاندىعىنىڭ 550 جىلدىعىنا ارنالعان «ۇلى دالا ەلى» تاريحي-مادەني ەكسپەديسياسى جامبىل وبلىسىندا ءبىرقاتار تاريحي ورىندارعا باردى، دەپ حابارلادى جامبىل وبلىسىنىڭ قازاقستان حالقى اسسامبلەياسىنان. 
جامبىل وبلىسىندا ەكسپەديسيا مويىنقۇم اۋدانىندا بولدى. وندا قازاق حاندىعىنىڭ قۇرىلۋىمەن تىعىز بايلانىستى تاريحي جەرلەردى ارالادى. اتاپ ايتقاندا، ەكسپەديسيا كەرەي مەن جانىبەك حاندار تۇعىر تىككەن قوزىباس جەرى، سونىمەن قاتار، اڭىراقاي دالاسى مەن كەرەي حاننىڭ قىستاۋى، شارىباي تاۋ شاتقالى جانە بالبالتاستار ساقتالعان جايساڭ جەرىنە باردى.   

ەسكە سالا كەتەيىك، 8 قازاندا ساعات 15.00-دە قازاق حاندىعىنىڭ 550 جىلدىعىنا ارنالعان رەسپۋبليكالىق ءىس-شارالار اياسىندا تاراز قالاسى م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ عيماراتىندا قازاقستان حالقى اسسامبلەياسىنىڭ «ۇلى دالا ەلى» رەسپۋبليكالىق تاريحي-مادەني ەكسپەديسياسىن قورىتىندىلاۋ بويىنشا حالىقارالىق عىلىمي-تاجىريبەلىك كونفەرەنسيا وتەدى.

اتالعان ءىس-شاراعا قحا ءتوراعاسىنىڭ ورىنباسارى - حاتشىلىق مەڭگەرۋشىسى، ساياسي عىلىمدار دوكتورى ەرالى توعجانوۆ، جامبىل وبلىسىنىڭ اكىمى كارىم كوكىرەكبايەۆ، قازاق ۇلتتىق ونەر ۋنيۆەرسيتەتى قورقىت اتا مۇراسىن زەردەلەۋ بويىنشا عىلىمي-زەرتتەۋ ورتالىعىنىڭ ديرەكتورى، قحا عىلىمي-ساراپتامالىق كەڭەسىنىڭ مۇشەسى، فيلولوگيا عىلىمدارىنىڭ دوكتورى، پروفەسسور مىرزاتاي جولداسبەكوۆ، قحا مۇشەلەرى، قحا عىلىمي-ساراپتامالىق كەڭەسىنىڭ مۇشەلەرى، قازاقستان مەن تمد ەلدەرىنىڭ كورنەكتى تاريحشىلارى، قوعام قايراتكەرلەرى، ەتنومادەني بىرلەستىكتەردىڭ وكىلدەرى، قحا ەكسپەديسياسىنىڭ مۇشەلەرى، جاستار قاتىسادى.

فورۋم اياسىندا قحا «ەكسپەديسيا قاتىسۋشىلارىنىڭ جازبالارى» اتتى كۇندەلىكتەر مەن بىرەگەي مۇراعاتتىق قۇجاتتار سالتاناتتى تۇردە تابىستالىپ، قحا عىلىمي ساراپتامالىق كەڭەسىنىڭ مۇشەسى، تاريح عىلىمدارىنىڭ دوكتورى گەورگيي كان مەن ءال-فارابي اتىنداعى قازۇۋ «قازاقستان تاريحى» كافەدراسىنىڭ مەڭگەرۋشىسى تالاس وماربەكوۆ وتكىزەتىن قحا-نىڭ «ۇلى دالا تاريحى» عىلىمي زەرتتەۋىنىڭ تانىستىرىلىمى بولادى.

فورۋم قورىتىندىسى رەتىندە ونىڭ قاتىسۋشىلارىنىڭ مەملەكەت باسشىسى ن.ءا.نازاربايەۆقا ارناعان ۇندەۋى قابىلدانادى.

ساعات 14.00-تەن 15.00-كە دەيىن م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ حوللىندا قحا ەكسپەديسياسىنىڭ قورىتىندىسىنا ارنالعان «قازاق ەلى تاريحى» كورمەسى فورۋم قاتىسۋشىلارىنىڭ نازارىنا ۇسىنىلادى.

8 قازاندا ساعات 11.30-دا م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ عيماراتىندا ب ا ق وكىلدەرىنە ارنالعان «ۇلى دالا ەلى» حالىقارالىق فورۋمى تۋرالى» باسپا ءسوز كونفەرەنسياسى وتەدى. كونفەرەنسيا سپيكەرلەرى: قحا ءتوراعاسىنىڭ ورىنباسارى - حاتشىلىق مەڭگەرۋشىسى، ساياسات عىلىمدارىنىڭ دوكتورى ەرالى توعجانوۆ، جامبىل وبلىسىنىڭ اكىمى كارىم كوكىرەكبايەۆ، قازاق ۇلتتىق ۋنيۆەرسيتەتى قورقىت مۇراسىن زەرتتەۋ عىلىمي ورتالىعىنىڭ ديرەكتورى، قحا كەڭەسىنىڭ مۇشەسى، فيلولوگيا عىلىمدارىنىڭ دوكتورى، پروفەسسور - مىرزاتاي جولداسبەكوۆ، ق ر پرەزيدەنتى جانىنداعى «قوعامدىق كەلىسىم» رمم ديرەكتورى - ناتاليا كالاشنيكوۆا.

ەسكە سالا كەتەيىك، «100 قادام» ۇلت جوسپارىنىڭ ەرەجەلەرىن ىسكە اسىرۋ ماقساتىندا قازاقستان حالقى اسسامبلەياسى سەرىكتەستەرمەن بىرلەسە وتىرىپ، «ۇلى دالا ەلى» رەسپۋبليكالىق تاريحي-مادەني ەكسپەديسياسىن ۇيىمداستىردى.

ەكسپەديسيا 2015 جىلعى 11 قىركۇيەكتە ءۇش قالادا - استانا، اقتاۋ، پاۆلودار قالالارىندا ءبىر مەزگىلدە باستاۋ الىپ، 2015 جىلعى 9 قازاندا تاراز قالاسىندا قورىتىندىلانادى.