الماتى. قازاقپارات - بۇگىن الماتىدا "نۇر وتان" پارتياسى قالالىق فيليالىنىڭ ءتوراعاسى، قالا اكىمى باۋىرجان بايبەكتىڭ توراعالىعىمەن قالالىق فيليالدىڭ ساياسي كەڭەسى بيۋروسىنىڭ كەڭەيتىلگەن وتىرىسى ءوتتى.
جيىن بارىسىندا پارتيا اقف جانىنداعى قالالىق سىبايلاس جەمقورلىققا قارسى كۇرەس جونىندەگى قوعامدىق كەڭەستىڭ ەسەبى تىڭدالىپ، ءبىلىم بەرۋ جانە دەنساۋلىق ساقتاۋ سالالارىنداعى حالىققا قىزمەت كورسەتۋدەگى اشىقتىق پەن ەسەپتىلىك شارالارى قارالدى.

«ەلباسى باسشىلىعىمەن ەلىمىزدە جەمقورلىققا قارسى ءىس-قيمىل قارقىندى كۇش الىپ كەلەدى. كۇرەستىڭ يدەولوگيالىق نەگىزى قالىپتاسىپ،  قۇقىقتىق بازاسى نىعايتىلدى. مەملەكەتتىك قىزمەتتى جەتىلدىرۋ ماقساتىندا كەشەندى رەفورما جۇرگىزىلىپ كەلەدى. مەريتوكراتيا پرينسيپتەرىنە نەگىزدەلگەن كاسىبي «ا» كورپۋسى جابدىقتالدى. ساياسي كەڭەستىڭ وتىرىسىندا 2015-2025 جىلدارعا ارنالعان ءىس قيمىلدىڭ پارتيالىق باعدارلاماسىن قابىلدادىق. مەملەكەت باسشىسى ون جىلعا ارنالعان مەملەكەتتىك ستراتەگيانى بەكىتتى. بۇل ماسەلەلەر ەلباسى ۇسىنعان 5 ينستيتۋسيونالدىق رەفورمادان كورىنىس تاپتى. ءبىز ءۇشىن بۇل اسا جاۋاپتى مىندەت»، - دەدى پارتيا فيليالىنىڭ ءتوراعاسى.

وتىرىس بارىسىندا جەمقورلىق كورىنىسىن تۇبەگەيلى جويۋ ماقساتىندا اكىم اپپاراتى مەن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل جونىندەگى دەپارتامەنتكە ءبىر اي مەرزىمىندە ايماقتىق باعدارلامانى قايتا قاراۋ جانە ءبىرقاتار ناقتى شارالارمەن تولىقتىرۋ تاپسىرىلدى.

قالالىق ءماسليحات دەپۋتاتى الشانوۆ راحماننىڭ ايتۋىنشا، كوپتەگەن مەملەكەتتىك مەكەمەلەردە سايت جۇمىس جاسامايدى نەمەسە مۇلدە جوق. سەنىم تەلەفوندارىنا ەشقاشان حابارلاسۋ مۇمكىن ەمەس. 

«36 جەرگىلىكتى اتقارۋ ورگانىنىڭ 5-ىندە سايت جوق. ونىڭ ىشىندە اۋىلشارۋاشىلىعى، جەر قاتىناستارى، ءدىن ىستەرى، اۆتوجولدار، ءتۇرعىن-ۇي ينسپەكسياسى باسقارمالارىنىڭ ارنايى سايتتارى جوق. سايتى بار باسقارمالاردىڭ وزىندە كوپشىلىگىندە سەنىم تەلەفوندارى، ازاماتتاردى قابىلداۋ ۋاقىتى كورسەتىلمەگەن»، - دەدى راحمان الشانوۆ

اكادەميك ر.الشانوۆ پارتيا مەن مەملەكەتتىك ورگاندار قىزمەتىن ۇيلەستىرۋدىڭ قوعامدىق كەڭەسكە جۇكتەلۋى  قالاداعى الەۋمەتتىك، مەديسينالىق، قۇقىقتىق قىزمەتتىڭ ساپاسىن كوتەرۋگە، ءبىلىم سالاسىنداعى «اقشا جيناۋ» سياقتى ۇردىستەرگە توسقاۋىل قويۋعا ىقپال ەتەرىنە سەنىم ءبىلدىردى. 

دەرەككوز:قازاقپارات