الماتى. قازاقپارات - بيىلعى «الماتى تۋرى» ۆەلوجارىسى وتكەن جىلعى جارىسقا قاراعاندا قيىنىراق بولدى. ويتكەنى، مىقتى كوماندالار، مىقتى ۆەلوشاباندوزدار جينالدى، دەدى جارىس سوڭىندا جۋرناليستەرگە بەرگەن سۇحباتىندا «الماتى تۋرى-2015» ۆەلوجارىسىنىڭ جەڭىمپازى - «Astana Pro Team» كومانداسىنىڭ ۆەلوشاباندوزى الەكسەي لۋسەنكو. 
«بيىلعى جارىس وتكەن جىلعى جارىسقا قاراعاندا اۋىر بولدى. ويتكەنى، مىقتى كوماندالار، مىقتى ۆەلوشاباندوزدار جينالدى. بۇل تەك مەنىڭ عانا جەڭىسىم ەمەس، بۇكىل كوماندانىڭ جەڭىسى. مەنى وسى «Astana pro team» كومانداسى ءوسىردى، جەتىلدىردى. سوندىقتان، بۇل جەڭىس بارلىعىمىزعا ورتاق»، - دەدى ا. لۋسەنكو.

سونىمەن قاتار، ول مارەگە 25 شاقىرىم قالعاندا نەگىزگى توپتان سىتىلىپ شىعىپ، كەيىن جالعىز ءوزىنىڭ العا شابۋىل جاساۋىنىڭ سەبەبىن ءتۇسىندىردى.

«بۇل جاعداي وسى جارىس بارىسىندا ورىن الدى. ازەربايجاننىڭ باكۋ كومانداسىنىڭ شاباندوزى مارەگە 25 شاقىرىمداي قالعاندا العا ۇمسىندى. مەن دە العا ۇمتىلدىم. ءسويتىپ، ەكەۋمىز نەگىزگى توپتان بىرگە سىتىلىپ شىقتىق. ول كەيىن ارتتا قالىپ قويدى. مەن جەكە-دارا كوش باستادىم. سودان بىرتىندەپ جىلدامدىقتى ۇدەتە ءتۇسىپ، مارەگە دەيىن ەكى مينۋتتاي ۋاقىت ۇتتىم»، - دەدى ا. لۋسەنكو.

«كوماندانىڭ كوشباسشىسى بولۋعا دايىنسىڭ با؟» - دەگەن سۇراققا الەكسەي دايىن ەكەندىگىن جەتكىزدى.
«مەن ءتىپتى الداعى جىلدىڭ وزىندە قانداي دا ءبىر حالىقارالىق جارىسقا كوماندانىڭ كوشباسشىسى رەتىندە قاتىسۋىم دا مۇمكىن. مۇنى ەندى كوماندا باسشىلىعى شەشەدى»، - دەدى ا. لۋسەنكو.

ايتا كەتەلىك، «Astana Pro Team» كومانداسىنىڭ ۆەلوشاباندوزى الەكسەي لۋسەنكو حالىقارالىق «الماتى تۋرى» ۆەلوجارىسىندا وسىمەن ەكىنشى رەت جەڭىسە قول جەتكىزدى. ونىڭ كورسەتكىشى - 4 ساعات 13 مينۋت 09 سەكۋند. 
ال وتكەن جىلعى جارىستا ول 186 شاقىرىمدىق قاشىقتىقتى 4 ساعات 12 مينۋت 17 سەكۋنتدا باسىپ وتكەن بولاتىن

دەرەككوز: قازاقپارات