قىزىلوردا. قازاقپارات - پرەزيدەنت نۇرسۇلتان نازاربايەۆ بۇۇ باس اسسامبلەياسى سەسسياسىنىڭ مىنبەرىنەن سويلەگەن سوزىندە قازاقستاننىڭ سىرتقى ساياساتتاعى ايقىن ۇستانىمى:  يادرولىق قارۋسىزدانۋ، يادرولىق سىناقتارعا تىيىم سالۋ، بەيبىت اتوم ماسەلەلەرى، تەرروريزم مەن ءدىني ەكسترەميزمگە قارسى كۇرەس ت.س.س. ماڭىزدى ماسەلەلەردى العا تارتتى.
ەلباسىنىڭ بۇۇ-داعى سويلەگەن ءسوزى جايلى پىكىرىن قورقىت اتا اتىنداعى قمۋ فيلوسوفيا جانە مادەنيەتتانۋ كافەدراسىنىڭ مەڭگەرۋشىسى، پروفەسسور وڭعار بەرماحانوۆ وسىلايشا ءوربىتتى.         

«بۇل جاڭا يدەيا العاش رەت الەمدىك دەڭگەيدە قازاق ەلىنىڭ ءوز تاۋەلسىزدىگى مەن مۇددەسىنىڭ كەپىلى، سونىمەن قاتار ەشبىر ەلدىڭ مۇددەسىنە قايشى كەلمەيتىن ۇستانىم رەتىندە قازاق تىلىندە العاش رەت ۇسىنىلدى. ول ءۇشىن بۇۇ ەكونوميكالىق جانە الەۋمەتتىك كەڭەسىن جاھاندىق دامۋ كەڭەسىنە اينالدىرۋ قاجەت. كەڭەس قازىرگى ەكونوميكالىق جانە قارجى داعدارىسىمەن كۇرەسەتىن ورتاق ۇيىم بولۋى ءتيىس. وسى باعىتتا الەمدىك ەميسسيا جانە الەمدىك رەزەرۆتىك ۆاليۋتالار اينالىمىن رەتتەۋ قاجەت. مۇنىڭ ءوزى بارلىق ەلدەردىڭ مۇددەلەرىن تەڭ دارەجەدە ۇستاي الاتىن جاڭا الەمدىك ۆاليۋتانى دايىنداۋدى  كۇن تارتىبىنە قويادى. ۋكراينا داعدارىسى مەن سانكسيالار قۇقىعى بۇۇ قاۋىپسىزدىك كەڭەسىنىڭ قۇزىرىندا بولۋى ءتيىس. ويتكەنى ونىڭ ميللياردتاعان ادامنىڭ تاعدىرىنا تىكەلەي اسەرى بار. تەرروريزم مەن ءدىني ەكسترەميزم ماسەلەسى دە وسى باعىتتا شەشىلۋى ءتيىس.

سونداي-اق بيىك مىنبەدەن الەم ەلدەرىن «بولاشاقتىڭ ەنەرگياسى» تاقىرىبىنداعى استانادا وتەتىن «ەكسپو-2017» كورمەسىنە قاتىسۋعا  شاقىرا  وتىرىپ، جاسىل تەحنولوگيانى دامىتۋ ورتالىعىن اشۋعا بۇۇ قولداۋىن سۇرادى»،-دەپ ءبىر تۇيىندەدى پروفەسسور.

  «ق ر پرەزيدەنتىنىڭ سوڭعى جولداۋلارى مەن باستامالارىندا ايتىلىپ جۇرگەن «تاياۋ بولاشاقتاعى الەمدىك ارحيتەكتۋرانىڭ وزگەرۋى» بولجامى قازاقستان مۇدەسىنە سونىمەن بىرگە بارلىق ەلدەردىڭ ماقساتتارى مەن مۇددەلەرىنە قايشى كەلمەيتىن   الەمدىك جاڭا باعىتتى قاجەت ەتەتىنى وزىنەن ءوزى تۇسىنىكتى.  بۇعان جاۋاپ رەتىندە بۇۇ قولداۋىمەن «جاڭا بولاشاق» (NEW FUTURE) تۇجىرىمداماسىن ۇسىندى. «جاڭا بولاشاق» دەگەنىمىز-«يادرولىق، ەنەرگەتيكالىق سۋ جانە ازىق-تۇلىك قاۋىپسىزدىگى، سەنىم، جانە ءوزارا تۇسىنىستىك»،-دەدى مەملەكەت باسشىسى. ەگەر اتالعان پروبلەمالاردى تارقاتا تالداساق، ونىڭ ادامزات بالاسىنىڭ تۇپكىلىكتى مۇددەلەرىنە قاتىستى ەكەنىن باعامداۋ قيىن ەمەس. وسىعان قوسا الەمدىك دامۋ ۆەكتورىن بولجاي وتىرىپ، دامۋشى كۇشتەردىڭ ازيا وڭىرىنە اۋىسقانىن، سوندىقتان بۇۇ باس شتابىن ازياعا قاراي كوشىرۋ ماسەلەسىن دە ويلاستىرۋدى ۇسىندى. بۇل بارلىق ەلدەردىڭ قولداۋىن، ريزاشىلىعىن تۋدىرادى دەپ ويلايمىن. الەمدىك دامۋ لوگيكاسىنا نەگىزدەلگەن، دەمەك ادىلەتتى ۇسىنىس ەكەندىگى داۋ تۋدىرماسا كەرەك»،-دەپ قورىتىندىلادى و. بەرماحانوۆ.