قىزىلوردا. قازاقپارات - بۇگىن قىزىلوردادا «التىن كۇز-2015» مەرەكەسىنە وراي اۋىل شارۋاشىلىق جارمەڭكەسى ءوتتى. 
بارلىق اۋدان مەن قالا ماڭىنداعى شارۋا قوجالىقتارىنان 522 كولىكپەن 1690 توننا ءونىم اكەلىندى. جالپى سومماسى 406،1 ميلليون تەڭگەنى قۇرايدى. اۋىل شارۋاشىلىق داقىلدارى نارىق باعاسىنان 15-20 پايىز ارزان ساتىلدى. جارمەڭكەلەر وبلىس ورتالىعىنىڭ 9 مولتەك اۋدانىندا ءوتتى. ايماق باسشىسى قىرىمبەك كوشەربايەۆ بارلىق جارمەڭكەنى ارالاپ، تۇرعىندارمەن تىلدەستى.

سىر ديحاندارى بيىلعى جىلى كۇرىشتىڭ ءار گەكتارىنان 50،5 سەنتنەر ءونىم جيناپ، ەل قامباسىنا 423 مىڭ توننادان استام استىق قۇيدى. بۇل ەل تاۋەلسىزدىگى كەزەڭىندەگى رەكوردتىق كورسەتكىش سوڭعى 3 جىل بويى قاتارىنان قايتالانىپ وتىر. 

ايماقتا ەگىن شارۋاشىلىعىمەن بىرگە مال، بالىق شارۋاشىلىعىن دامىتۋ بارىسىندا دا تابىستار كوپ. بۇل سالالاردى ءارى قاراي دامىتۋ ماقساتىندا جاڭاقورعان اۋدانىندا ءبىرىنشى رەت مالشىلار سلەتى جانە  ارال اۋدانىندا   ءبىرىنشى رەت بالىقشىلار سلەتى ءوتتى.  ايتا كەتەيىك، بيىل وبلىستا قۋاتى جىلىنا 7 مىڭ توننا توقتى ەتىن وڭدەيتىن ەت كومبيناتىن جانە ءىرى مال بورداقىلاۋ الاڭدارىن سالۋ جۇمىستارى قولعا الىندى.

ءبىر ەرەكشەلىگى بۇل جولعى جارمەڭكەدە ۇلتتىق سۋسىندار مولىنان بولدى. سونداي-اق، كارتوپ، جۋا، ءسابىز سەكىلدى داقىلداردى تۇرعىندار تالاسا-تارماسا الدى. ويتكەنى، باعاسى قالتاعا قونىمدى. 50-60 تەڭگەنىڭ شاماسىندا ساۋدالاندى. قالا تۇرعىندارى قىستىق ازىقتارىن ارزان باعادا الىپ جاتقاندىقتارى ريزاشىلىقتارىن ءبىلدىردى.