الماتى. قازاقپارات - الماتىدا تاڭعى ساعات 09:45-تە حالىقارالىق «الماتى تۋرى-2015» بىركۇندىك تاس جولدىق ۆەلوجارىسى باستالدى.
جارىستىڭ سالتاناتتى اشىلۋ راسىمىندە سويلەگەن سوزىندە الماتى قالاسىنىڭ اكىمى باۋىرجان بايبەك ۆەلوشاباندوزداردى بيىلعى تۋرعا قاتىسىپ جاتقاندارىنا العىسىن ءبىلدىرىپ، ولارعا ساتتىلىك تىلەدى.
«بۇل سپورت مەرەكەسى جىل وتكەن سايىن ۇلعايىپ، ۆەلوسايىس الەمىندە ۇلكەن بەدەلگە يە بولۋدا. تۋرعا قاتىسۋشى الەمنىڭ ۇزدىك كوماندالارى مەن ۆەلوسپورت مايتالماندارىنىڭ سانى كۇن وتكەن سايىن ارتىپ كەلەدى. بۇل - ءبىز ءۇشىن ۇلكەن مارتەبە. وتاندىق ۆەلوسپورتشىلارعا حالىقارالىق دەڭگەيدە كۇش سىناۋعا بەرىلگەن بىرەگەي مۇمكىندىك. ال قالا تۇرعىندارىنا جاسالعان ۇلكەن سىي. «الماتى تۋرى» ۆەلوجارىسى بيىل ءۇشىنشى رەت وتكىزىلىپ جاتىر. وتكەن جىلى حالىقارالىق ۆەلوسيپەدشىلەر وداعى بۇل تۋردىڭ مارتەبەسىن 1.1ساناتىنا كوتەرگەن. ەندى وعان الەمدىك دەڭگەيدەگى كاسىپقوي كوماندالار دا قاتىسا الادى. بۇل ءسوزسىز، جارىستىڭ بەدەلىن دە، مارتەبەسىن دە ارتتىرا تۇسەدى. ەندى كوماندالار اراسىندا جارىس بارىنشا تارتىستى بولا تۇسەدى دەگەن سەنىمدەمىن. جۇزدەن جۇيرىك، مىڭنان تۇلپار شىقسىن»، - دەدى ب. بايبەك.
«نۇرلى تاۋ» بيزنەس ورتالىعىنىڭ الدىنداعى سورەگە جينالعان كوماندالار تاڭعى ساعات 09:45-تە جارىس جولىنا شىقتى. بۇگىنگى سپورتتىق شارانىڭ اشىلۋ راسىمىنە قۇرمەتتى قوناق رەتىندە قاتىسقان «استانا ەكسپو-2017» ۇلتتىق كومپانياسىنىڭ باسقارما ءتوراعاسى احمەتجان ەسىموۆ «ستارت» تاپانشاسىنان اۋەگە وق اتىپ، جارىستى باستاپ بەردى.
ۆەلوشاباندوزدار 31 شاقىرىمنان تۇراتىن التى اينالىمدى ءجۇرىپ وتەدى. ياعني، جارىس جولىنىڭ جالپى قاشىقتىعى - 186 شاقىرىم.
«Astana Pro Team» كومانداسىنىڭ قۇرامىندا مىنا قازاقستاندىق ۆەلوشاباندوزدار قاتىسادى: «تۋر الماتى 2014» جەڭىمپازى الەكسەي لۋسەنكو، ارمان قامىشيەۆ، رۋسلان تلەۋبايەۆ، دانييل فومينىح، اندرەي زەيس ي باحتيار قوجاتايەۆ، جانە دە «ۆۋەلتا يسپانيا-2015» ۆەلوكوپكۇندىكتىن تريۋمفاتورى يتاليالىق فابيو ارۋ مەن ونىڭ وتانداسى پاولو تيرالونگو.
ايتا كەتەلىك، ۆەلوشاباندوزدار ءال-فارابي داڭعىلى بويىمەن باتىس باعىتتا جارىسا وتىرىپ، مۇستافين كوشەسى تۇسىنداعى اينالما جولمەن كەرى بۇرىلىپ شىعىسقا قاراي بەتتەيدى. ءال-فارابي داڭعىلىمەن شىعىس اينالما جولىنا شىققان ۆەلوشاباندوزدار تالعار باعىتى تۇسىنان اينالما جولمەن كەرى بۇرىلادى. وسى اينالىمدى ولار التى رەت اينالادى. مارە سىزىعى - «نۇرلى تاۋ» بيزنەس ورتالىعىنىڭ الدى (ءال-فارابي داڭعىلى مەن پانفيلوۆ كوشەسىنىڭ قيىلىسى).
