الماتى. قازاقپارات - بۇگىن الماتىدا ق ر تۇڭعىش پرەزيدەنتىنىڭ قورىندا الماتى اكىمدىگى مەن «ەكسپو-2017» باس مەردىگەرى قۇنى 10 ملرد. تەڭگە بولاتىن ءوزارا ىنتىماقتاستىق تۋرالى مەموراندۋمعا قول قويدى.
اتالعان كەلىسىمگە سايكەس ەندى الماتى قالاسىنىڭ كاسىپورىندارى استانادا وتەتىن اسا ماڭىزدى حالىقارالىق جوباعا قاتىسىپ، «ەكسپو-2017» جوباسىن ۇيىمداستىرۋ عانا ەمەس، قۇرىلىس جۇمىستارى مەن پايدالانۋ كەزەڭىندە دە ءوز ونىمدەرىن جەتكىزۋ جونىندە ۇزاق مەرزىمدى كەلىسىمگە كەلە الاتىن بولدى.

«بۇگىنگى فورۋمعا «ەكسپو-2017» ۇلتتىق كومپانياسى اتىنان ءتوراعا احمەتجان ەسىموۆتىڭ كەلىپ جاتقانىنا قۋانىشتىمىز. احمەتجان سماعۇل ۇلى - قالاداعى كوپتەگەن ماڭىزدى جوبالاردىڭ نەگىزىن قالاعان ادام. كورمەگە 40-تان استام كومپانيا قاتىستى. مەن ولاردىڭ ونىمدەرى وتە ساپالى دەپ ويلايمىن. الماتىلىق كاسىپورىندار «ەكسپو-2017»-گە بەلسەندى تۇردە قاتىسادى. ەلباسى ايتقانداي، ەكسپو - ەكونوميكامىزدىڭ درايۆەرى، تۋريزم سالاسىن دامىتۋعا، جاڭا جۇمىس ورىندارىن اشۋعا مۇمكىندىك بەرەدى. الماتىنىڭ 200-گە جۋىق كاسىپورنى ءار سالادا قازاقستاندىق قامتۋدى ماكسيمالدى قامتاماسىز ەتۋگە بارىنشا ۇلەس قوساتىن بولادى»، - دەدى قالا اكىمى باۋىرجان بايبەك.

ءوز كەزەگىندە «ەكسپو-2017» ۇق اق باسقارما ءتوراعاسى احمەتجان ەسىموۆ الماتى كاسىپورىندارىنىڭ قاتىسۋىنسىز حالقارالىق كورمەنى وتكىزۋ مۇمكىن ەمەستىگىن جەتكىزدى.

«كورمەنى تاماشالادىق. كوپتەگەن كومپانيالاردىڭ دامۋىن جاقسى بىلەم. ولاردا ءوزىم بولعانمىن. الماتىنىڭ پوتەنسيالى وتە جوعارى. الماتى - ەلىمىزدىڭ باستى لوكوموتيۆى. مۇندا عىلىم مەن ءبىلىم شوعىرلانعان. وسىعان دەيىن قالانىڭ «ەكسپو-2017» جوباسىنداعى قاتىسى وتە بەلسەندى ەمەس بولاتىن. سوما دا اسا ءماز ەمەس. 550 ملن. تەڭگە. بۇدان باستاپ ايماقتىق كاسىپكەرلەردىڭ قاتىسى بەلسەندى بولادى. بۇگىن قۇنى 10 ملرد. تەڭگە بولاتىن كەلىسىمگە قول قويامىز. الماتى - كەلىسىم جاسالىپ وتىرعان 9-شى ايماق. وسىعان دەيىن ەلىمىزدىڭ 8 ايماعىمەن كەلىسىمگە كەلگەن ەدىك»، - دەدى احمەتجان ەسىموۆ.

قالا اكىمىنىڭ ورىنباسارى ەرلان اۋكەنوۆتىڭ ايتۋىنشا، «ەكسپو-2017» جوباسىن  جۇزەگە اسىرۋدا الماتىنىڭ الەۋەتى جوعارى. قالادا 184 مىڭ بيزنەس سۋبەكتىسى، 1800 ءوندىرىس ورنى، 2،5 مىڭ قۇرىلىس كومپانياسى، 900 تۋريستىك فيرما، 122 قوناق ءۇي ورنالاسقان. ولاردىڭ كوپشىلىگى جالپىۇلتتىق جوباعا قاتىسۋعا ۇلكەن قىزىعۋشىلىق ءبىلدىرىپ وتىر.