31 قازاندا قحر شىڭجاڭ ۇيعىر اۆتونوميالىق رايونىنا قاراستى تارباعاتاي ايماعانىڭ ءدوربىلجىن اۋدانىنىق 1- ورتا مەكەتەبىنىدە وقيتىن قازاق قىزىن جۇڭگو قىزدارىنىڭ اياۋسىز ۇرىپ-سوققانى تۋرالى ۆيدەو ۆيچات الەۋمەتتىك جەلىسىندە تارالىپ،  قانداستارىمىزدىڭ اشۋ-ىزاسىن تۋدىردى. الەۋمەتتىك جەلىدەگى قازاقتاردىڭ نارازىلىعىنان كەيىن جۇڭگو ۇكىمەتىنىڭ ءتارتىپ ساقشىلارى قانداسىمىزعا كۇش كورسەتكەن وقۋشىلاردى قولعا الىپ، تەكسەرۋ جۇمىسىن جۇرگىزىپ جاتقانى تۋرالى اقپاراتتار كەلىپ تۇسۋدە.

ۆيدەونى كورەر بولساڭىز، قانداسىمىزدىڭ باسى كوزىنەن ۇرىپ، ىشىنەن تەپكىلەۋدە. بۇل ۆيدەونى كورگەن قاي قازاقتىڭ بولسا دا جۇرەگى اۋىرماي تۇرماس. بۇنى شالعاي اۋىل قىستاقتان ءبىلىم ىزدەپ كەلگەن قازاق بالاسىنىڭ كۇي جايىنان مالىمەت بەردى دەسەك تە بولادى. بۇدان تۇيەر ءتۇيىن: قانداستارىمىز ءوز وتانىن ەرتە باستان تاپپاسا ءالى دە مۇنداي تەپكىنىڭ تالايىن كورەرى انىق. سوندىقتان ۇكىمەت كوشى-قون تۋرلى زاڭدى تەزىرەك ىسكە قوسىپ، قانداستارىنىڭ ەلگە ورلۋىنا تۇرتكى بولىپ، ءوز قۇشاعىنا الىپ، پانا بولۋى ءتيىس.

تاعى ءبىر ايتا كەتەتىنىمىز، قازاق ەلىنىڭ اتا زاڭىندا: «قازاق ەلىنىڭ ەڭ ۇلكەن بايلىعى ادامدار»،- دەلىنگەن. ال، ءبىزدىڭ ادامدار – ءار ءبىر قازاق ازاماتى. قايدا جۇرسە دە قازاق بالاسىنىڭ ءوز يەسى بار. الەمدەگى قازاق بالاسىنا يەلىك ەتەر «دۇنيە ءجۇزى قازاقتارىنىڭ قاۋىمداستىعى» دا بار. ەندىگى سۇراق، وسى قاۋىمداستىق قازاق قىزدارىنىڭ قۇرساعىن تەپكىلەتىپ، قارا كوزدەرىمىزدىڭ كوزىنەن قاشانعى جاس اعىزا بەرەدى؟

ەستەرىڭىزگە سالا كەتسەك، 2008 جىلدان كەيىن قىتايداعى اۋىل قىستاقتارداعى قازاق ورتا  مەكەتەپتەرى جابىلىپ، قالاداعى مەكتەپتەر ارالاس مەكتەپتەرگە اينالعان بولاتىن. بۇل دا بولسا، سونىڭ جەمىسى بولۋى كەرەك. بۇدان كەيىن، ول جاقتاعى قانداستارىمىزدىڭ بولاشاعىنا قالاي الاڭدامايمىز؟

تۇردىبەك قۇرمەتحان