Estradaǵa jańa sıtlde qosylǵan jańa top "91" toby qoǵamda biraz pikirtalas týdyryp, qyzý talqyǵa tústi. Toptyń jetekshisi Erbolat Bedelhannyń jary, ári kómekshisi Asyl Bedelhan Abai.kz saıtyna suhbat berdi, - dep habarlaıdy Qamshy.kz  .

– Asyl, sonymen siz arasha túsken «91» tobyna qatysty daý tamam boldy ma, ol aqyry nemen aıaqtaldy

– Daýdyń aıaǵy bitken joq. Topty topyrlatyp synaý jalǵasýda. Bir jaǵynan, túsinemin: jańalyq ataýly synsyz paıda bolmaǵan. Biraq ýaqyt óte kele, tyńdarman da, áriptesterimiz de túsinedi dep senemin. «91» tobyna qarsy keletin ánshiler saýsaqpen sanarlyqtaı ǵana qaldy. Syrtyńnan sóılep, betke eshteńe aıta almaıtyndar da bar. Negizi, basqa, syrt elderde turatyn qazaqtardyń kózi ashyqtaý. Olar: «Qazaqstan mundaı jańalyqqa nege qarsy? Óreleri óspeı qalǵan ba?» – dep kúledi.

– Ózińizdi «Daýys International» tobynan bólinip ketkeli, sahnadan kóre almadyq. «Kózden taısa, kóńilden ketedi» demekshi, nelikten «joq bop» kettińiz?

– «Daýys International» tobynda úsh jyl án aıttym. Kelisim-shart osy ýaqytqa jasalǵan bolatyn. Ary qaraı jeke shyǵarmashylyǵymmen aınalysqym keldi. Kelisim-shart merzimi aıaqtalǵanda, toptan birjola kettim. Jeke ánshi retinde eki beınebaıan túsirdim. Alýa Qonarova, Gúlvıra Ilahýnova, Dılnaz Ahmadıeva jáne taǵy da basqa prodúserlermen jumys istedim.

Keıingi kezde shyǵarmashylyq daǵdarys boldy ma, bilmeımin: jumysym onsha júrmedi. Bir jaǵynan, ómir jolymdy qudaı solaı sheshken bolý kerek. Kezinde «Novaıa volna» baıqaýyna qatysyp, jartylaı fınalǵa deıin jetken kezim de bolǵan.

Onyń ústine balalarym da tym jas: úlkeni – tórtte, kishisi – úshte. Olardy aıaqqa turǵyzý kerek. Qudaı qalasa, úshinshisi bolady, aıaǵym aýyr. Biraq úıde bos otyrǵan joqpyn. Kúıeýimniń prodúserlik ortalyǵynda kómekshi dırektormyn. Atqaratyn jumysym kóp.

Bolashaqta sahnaǵa shyǵam, án aıtamyn desem, Erbolat qarsylyq bildirmeıdi. Ónerge qaıta oralýyma ata-enem de qarsy bolmaıdy. Ol kisiler Mońǵolıanyń eńbek sińirgen qaıratkerleri. Qaıyn atam – dombyra jáne kóp ishekti aspapta oınaıdy. Enem – mýzykalyq mektepti bitirgen, jetigende oınaıdy. Ónerdegi bizdiń aqylshy, keńesshilerimiz.

– Ol kisiler she, «91»-di túsine alyp júr me?

– Kóp synı pikirlerdi estigende, ákemiz: «Balalardyń syrǵasyn sheship, shashtaryn qara túske boıatqanda, mundaı daýǵa qalmaıtyn edińder ǵoı», – degen edi. Ras, toptaǵy ánshi jigitterdiń ata-analary da qatty ýaıymdady. Amal joq, ónerden ózgeshe álem tabý – qurbandyqsyz kelmeıdi. Sol kezderi bir-birimizge tek sabyr saqtaýdan basqa aıtarymyz bolmady.

– Orystardyń «Áıeli men eri – ekeýi bir peri» degen mátelinde aıtylǵandaı, «91» tobyna qatysty daý-damaıda Erbolatty jaqtap, áleýmettik jelide biraz «aıqas» júrgizdińiz. Sondaǵy sizge qarsy pikirlerden keıin qandaı oı túıdińiz? Kópshiliktiń ónerge, onyń ishinde ónerdegi jańalyqqa degen tańdaý-talǵamy keńestik kezdiń kebisin kıip júrgenin sezgen bolarsyz?

– Shamam kelgenshe, áleýmettik jelidegi jazylǵan biraz pikirlerdi oqyp shyǵýǵa tyrystym. Ras, arasynda qatty ashý-yzaǵa býlyqtym. Basynda «91» toby shyqpaı turyp, halyqtyń durys qabyldamaıtynyn bildik. Biraq dál osyndaı túsinbeýshilik bolady dep oılamappyn.

«Instagram» paraqshasy arqyly qazirgi adamdardyń qatygez ekenderine kózim jetti. Balalar ne istep, ne búldirip qoıdy, olardyń nendeı kinási bar? Olar óz úıinde tárbıe kóretin basqa balalardy qalaı búldirmek? Nege búkil qazaq jastarynyń tárbıesi tórt jigitke tirelip qaldy?

Qazaq dese, ózimizge tıedi: ınsta-paraqshadaǵy pikirlerdi oqı otyryp, adamdardyń saýatsyzdyǵyna tań qaldym. Dardaı qyz-jigitter óz oılaryn jetkize almaıdy. Qate jazylǵan sózderdi kórgende, jaǵamdy ustadym.Halqymyzdyń saýatynyń sondaı tómen deńgeıde ekenin, oılaý júıesiniń artta qalyp qoıǵanyn baıqadym.

Keńes kezindegi ata-anamnyń beınesi áli kúnge esimde. Sol kezdiń ózinde qala jastary shashtaryn uzyn etip ósirdi. Erterekte tym tar shalbar kıdi, bertin dalańdaǵan keń shalbardy erkek te, áıel de modaǵa aınaldyrdy. Sol kezdegi adamdar «mynaý qazaqqa jat nárse» degen joq qoı. Sán qýǵan jastaryn qaralamady. Sol ýaqytpen salystyryp qaraǵanda, qazirgi adamnyń kózqarasy kende qalyp, túısik-tanymy tómendep ketken be dep oılaımyn.

– Erbolat – siz úshin jar, balalaryńyzdyń ákesi. Al óner úshin ol kim? Onyń boıynda el bilmeıtin qandaı qudiret bar dep oılaısyz?

– Erbolatpen tanysqanyma 19 jyl bolypty: meniń jasym on tórtte, ol on jetide bolatyn. Onyń boıynda erekshe, ózine ǵana tán álemi baryn sonda baıqaǵanmyn. Sondyqtan «91» toby aıaq astynan nemese bir mezettegi oıdan týǵan joba emes. Erbolattyń bala armanynyń jelisi, birneshe jylǵy tájirıbesinen týǵan jemisi.

Erbolattyń boıynda qudaı bergen ónerge degen qasıeti, erekshe daryny bar. Jáne ol bos daý-damaıǵa joq adam. Bárine fılosofıalyq oı turǵysynda qaraıdy. Ózin renjitken adamdy tez keshire salady. Áıel bolǵan soń, keıde bireýlerdi sóz etkenimde: «Jurtta ne sharýań bar?!» dep ursady. Sonda da toqtamaı jatsam, úndemeı turyp ketedi.

Erbolattyń bir ánshilerdi jamandap, áldekimdi synaǵanyn estimegen ekenmin. Kóbinese adamdy bolmys-bitimimen túsinýge tyrysady. Jýyqta Aqylbek Jemeneıdiń keshinde Rınat Zaıytovtyń bılep, rep aıtyp shyqqanyn men mazaq qyldym. Al Erbolat ony qostap: «Jaqsy bolǵan eken, ózi de sahnaǵa shyqty. Jaraısyń!» dep, razyshylyǵyn bildirip jatty. Ózin qaralaǵan adamǵa eshqandaı renishin saqtamaǵan.

Biraq Rınat jóndep bıleı almaıdy, ne durystap rep oqı almaıdy: munysymen ne dáleldegisi keldi? Bylaı qaraǵanda, Rınat qylyǵy kúlkili nárse ǵoı. Biraq Erbolat oǵan basqa jaǵynan qarady. Onyń minezi sondaı.

Suhbattasqan Anar Anapıaeva, "Obshestvennaıa pozısıa"