Burynǵy tótenshe jaǵdaılar mınıstri, qazir májilis depýtatynyń kreslosyna jaıǵasqan Vladımır Bojko Ýkraına saıasatkeri Irına Farıondy saldaqyǵa teńedi, - dep habarlaıdy Qamshy.kz informburo.kz-ke silteme jasap.
Depýtat bul málimdemesin Qaraǵandyda etno-mádenı ortalyqtar ókilderimen kezdesýde aıtqan.
Depýtat eldiń ońtústik óńirlerinde orys tiliniń qoldanys aıasy tarylyp, ol tilde oqytýdyń azaıǵanyna alańdaýly kórinedi. Ol bul jaǵdaıdy keńestik kezeńdegi qazaq tiliniń taǵdyrymen uqsatatynyn ańǵartqan.
«Bireýler biler, bireýler bilmes, 1991 jyly elde qazaqsha oqytatyn jalǵyz-aq joǵary oqý orny boldy. Ol – qyzdar pedaogıkalyq ınstıtýty. Qalǵandary túgel orys tilinde oqytty. Men mektepti Almatyda oqydym, bizde qazaq tili muǵalimi bolmady. Iaǵnı, qazaqtar óz tilderin joǵaltyp ala jazdaǵan jaǵdaı bolǵan», - degen depýtat mundaı jaǵdaıdyń endi orys tiliniń basynda qaıtalanbaý kerektigin aıtypty.
Ýkraına men Reseıdiń til máselesindegi kelispeýshiligi qaqtyǵysqa ulasqanyn Bojko taqyrypqa tuzdyq etipti. Qyzdy-qyzdymen ózara daýly máseleleri bar eki eldiń ishki jumysyna aralasyp, biriniń saıasatkerin saldaqy etip tastapty.
«Men tarıhtyń ana saldaqy Farıondy (I. Farıon – Ýkraınanyń ulttyq baǵyttaǵy saıasatkeri – red.) ornyna qoıǵanyn qalaımyn. Sizder meni keshirińizder, árıne, ol Ýkraınada halyqtyń 30-40 paıyzy orys tilinde sóıleıdi deıdi, negizi onda barlyǵy oryssha sóıleıdi. Ol orys tilinde sóıleıtinderdi adam sanamaıdy, oryssha sóıleýge quqyq bermeýdi, oryssha án tyńdaǵan taksıshilerge aıyp pul salý kerek deıdi. Mundaıdy joǵary zań shyǵarýshy organda aıtý úshin qandaı naqurys bolý kerek?», - degen Bojko óziniń bul tótenshe málimdemesi bóten eldiń ishki saıasatyna aralasý ekenin ańǵarmaı qalǵan sekildi.
Ańǵarmaǵany bolsa kerek, Ýkraına qoǵamyndaǵy til máselesine «memlekettik basqarý organdarynyń jumysyndaǵy olqylyq» dep baǵa da berip tastapty.
Depýtat Qazaqstannyń bul máseledegi «jetistikterine» toqtalýdy da umytpaǵan.
«Qujat aınalymy eki tilde júrgiziledi. Hat qaı tilde kelse, sol tilde jaýap jazylady. Bul qoǵamdaǵy shıelenis oshaqtaryn joıýǵa kómektesedi», - depti V. Bojko.
Bizdegi bılik ókilderiniń halyqaralyq máselede dórekilik tanytýy bir bul emes. Mádenıet jáne sport mınıstri Arystanbek Muhamedıuly da mamyr aıynda Máskeý qonaq úılerinde dárethana jýatyn qyrǵyz qyzdaryn sóz etemin dep, kórshi eldiń Syrtqy ister mınıstrligi narazylyq nota jiberýine sebep bolǵany bar.
