Qyzǵaldaqtar elinen kelgen qandasymyz Murat Ónel atajurtqa alǵash qadam basyp otyr. Aty ańyzǵa aınalǵan «Aıaks» fýtbol mektebiniń túlegi Shymkentke qala ákimi Darhan Satybaldynyń shaqyrtýymen kelgen bolatyn.

Jergilikti «Qyran» komandasymen kelisim-shartqa otyrǵan jas jigit taıaýda qala basshysynyń jeke qabyldaýynda boldy.

Murat Darhan Satybaldyǵa sheksiz rızashylyǵyn bildirip, alǵysyn jetkizdi. Sonymen qatar ol kári qurlyqtan Shymkent qalasynyń ákimine kádesyı retinde ákelgen Golandıa ulttyq quramasynyń jeıdesin tartý etti.

Sondaı-aq, Murat Shymkentte qazaqtardyń kóptigine dán rıza. Aıtýynsha, Golandıada qyryq shaqty qazaq januıasy bar eken.

- Munshama kóp qandastardy ómirimde alǵash ret kórdim. Maǵan osyndaı múmkindik syılaǵan Shymkent qalasynyń ákimine sheksiz alǵys aıtamyn. Ultjandy azamat eken! Munda meniń ana tilimdi úırenýime kóptegen qazaq balalary kómektesýde,- deıdi Murat. Ol aǵylshyn jáne túrik tilinde sóıleıdi. — Maqsatym qazaq qyzyna úılenip, osynda otbasyn qurý. Ata-anam meni atajurtqa shyǵaryp salarda -fýtbol oınamasań da Qazaqstanda qalýǵa umtyl degen-di. Áke-sheshemniń úmitin aqtaýǵa tyrysamyn. Qazaqstannyń Golandıadan aıyrmashylyǵy kóp. Alaıda, Darhan aǵa sekildi azamattar qamqor bolsa, úırenip ketemin dep oılaımyn. Iá, maǵan «Aıaks» fýtbol mektebinde jattyǵý baqyty týdy. Biraq, ondaǵy qazaq balalarynyń kópshiliginde fýtbolmen aınalysý múmkindigi joq. Sebebi, ondaǵy sport mektepterinde oqý úlken qarjyny talap etedi. Al qyzǵaldaqtar elindegi qandastardyń kópshiliginde ondaı múmkindik joq. Sol sebepti, qazaq balalary erjete jumys istep, qarajat tabýǵa tyrysady. Aıta keteıik, Murat Ónel Qazaqstan fýtbol chempıonatynda «Qyran» klýby sapynda «Astana 1964» komandasymen ótken alǵashqy kezdesýinde gol salyp, jeńiske jetýine septigin tıgizgen bolatyn.