Bir aıdan soń "Jeńis kúni" merekesi. Qazaqtyń «Uly otany» qaısy? Qazaqtyń qanyn sýsha aǵyzǵan Stalınnyń aýyzynan shyqqan bul sózdi Alash balasy nege sonsha Qudaı sózindeı kóredi? Jıhan soǵysy bolǵanyn, ol soǵysta quramynda Qazaqstan bar Keńes odaǵynyń jeńiske jetkenin eshkim joqqa shyǵarmaıdy. Biraq táýelsiz eldiń urpaǵynyń óz «Uly otany» bar. Ol - Qazaqstan. Álde esimizdi ekeý, túsimizdi tórteý qylǵan quldyqtyń qamytyn sheshkimiz kelmeı me? Esterińizde bolsa, İİ dúnıejúzilik soǵystyń 60 jyldyǵy qarsańynda Reseı «Táýelsiz memleketter dostastyǵy úshin barlyǵymyz bir kisideı merekeni atap óteıik!» degende, Baltyq elderi ne dedi? «Uly otandaryńnyń» jeńisin toılaı berińder, «bizdiń Uly otan basqa» dedi de qolyn biraq siltegen. Ólgen-tirilgenine qarmaı, «Otan, otan» dep júrgen sol baıaǵy bizdiń el! Táýelsiz Qazaqstannyń kók týynyń astynda «Uly otan soǵysy» dep urandaýǵa tıispiz be? San ǵasyrlyq táýelsizdik kúresi «Uly otan soǵysynan» kem be? Ult batyry Kenesarynyń basyn ustap otyrǵan sol «Uly otan» emes pe? Iá, İİ dúnıejúzilik soǵysqa qatysqan qarttarymyz bar. Olarǵa páter bersin, kólikte tegin júrgizsin... Kóneniń kózine qandaı syı jasasada eshkimniń qarsylyǵy joq. Ol úshin «Uly otan» dep urpaqty adastyrýdyń qajeti qansha?

Aıtyńyzshy, Sizdiń «Uly Otanyńyz» qaısy?