Bul kúnderi Brazılıanyń Rıo-de-Janeıro qalasynda ótip jatqan XXXI jazǵy Olımpıada oıyndarynda Qazaqstan tarıhynda júzýden tuńǵysh ret Olımpıada chempıony atanǵan 21 jastaǵy Dmıtrıı Balandın jańa ǵana týǵan qalasy Almatyǵa oraldy, - dep habarlaıdy Qamshy.kz QazAqparatqa silteme jasap.
Halyqaralyq áýejaıdyń VIP-termınalynda jeńimpazdy Almaty qalasynyń ákimi Baýyrjan Baıbek, QazUÝ rektory Ǵalym Mutanov, sondaı-aq, Dmıtrıı bilim alatyn osy ál-Farabı atyndaǵy QazUÝ stýdentteri, sport salasyndaǵy uıymdardyń ókilderi, jas sportshylar, qala turǵyndary - barlyǵy 300-den astam adam zor qýanyshpen qarsy aldy.
Qoldaryna transparanttar, plakattar men kók baıraq ustaǵan jastar Dmıtrıı VIP-termınaldan shyqqan bette «Balandın -chempıon», «Alǵa Qazaqstan» dep urandatty.
«Dmıtrıı Balandınniń Rıo ótip jatqan jazǵy Olımpıada oıyndaryndaǵy jeńisi - bizdiń el úshin tarıhı jeńis. Biz búkil el bolyp, bul jeńiske erekshe qýandyq. Minekı, 21 jastaǵy Dmıtrıı Balandın birneshe kúnniń ishinde jastardyń «kýmırine» aınaldy. Biraq, ol qarapaıym, bıazy jigit. Bul jeńis onyń basyn aınaldyryp jibermeıdi dep oılaımyn. Dmıtrııdiń jeńisi kezdeısoq jeńis emes. Ol bul jarysqa jyldar boıy ter tógip daıyndaldy. Sóıtip, ádil túrde jeńimpaz atandy. Aldaǵy ýaqytta elimizde Dmıtrıı Balandın sekildi jastar kóptep shyǵyp, chempıon atanyp, elimizdiń abyroıyn arttyrady degen senimdemin», - dedi óz sózinde Almaty qalasynyń ákimi B. Baıbek.
Óz kezeginde Dmıtrıı Balandın qala basshysyna jáne chempıondy qarsy alýǵa kelgen barsha azamattarǵa rızashylyǵyn bildirdi.
«Bizge qoldaý kórsetkenderińizge shyn júrekten alǵysymdy bildiremin. Sizderdiń qoldaýlaryńyzdy biz qashanda sezinip júrdik. Men úshin elimizdi álemge tanytý, kók Týdy jelbiretý asqan mártebe», - dedi D. Balandın.
Budan keıin, jankúıerler Dmıtrıımen fotoǵa túsip, odan japa-tarmaǵaı qoltańba alýǵa kiristi.
Aıta ketelik, búgin Dmıtrıı Balandınmen birge Almatyǵa onyń ata-anasy men jeke bapkeri Alekseı Kazakov, sondaı-aq, shalqalap júzýden qazaqstandyq sportshy Ekaterına Rýdenko, bas jattyqtyrýshy Oleg Vagızov ushyp keldi.
Dmıtrıı Balandın Rıo-de-Janeıro qalasynyń Olımpıadalyq júzý ortalyǵynda ótken jarysta 200 metrge bras ádisimen júzý boıynsha Olımpıada chempıony atandy. Onyń kórsetkishi - 2:07.46 mınýt.
