Erkin kúresten London Olımpıadasynyń qola júldegeri, Qazaqstan Respýblıkasynyń tórt dúrkin chempıony Aqjúrek Tańatarov Rıo Olımpıadasynda kúresten baq synaǵan sportshylarymyz ben Qazaqstan quramasynyń bapkerlerine qatysty oıyn bildirdi, - dep habarlaıdy Qamshy.kz.
Aqjúrek Tańatarov Instagram paraqshasynda Rıodaǵy keleńsiz jaǵdaılardan keıin Kúres federasıasy barlyǵyn jónge keltiredi degen senimdemin dep jazǵan.
«Búgin Olımpıada oıyndarynyń sońǵy kúni. Biraq erkin kúresten bizdiń palýandarymyz medalsyz qaldy. Sońǵy úmit Mamed Ibragımde. Aıtaıyn degenim, bar júkti palýandarǵa artpaı, basshylyqtan da suraý alý kerek shyǵar. Sózdiń ashyǵy, Kúres federasıasyna temirjolshylardy emes, naǵyz kúres maıtalmandaryn shaqyrtý kerek. Elimiz naǵyz erkin kúres mamandarynan kende emes. Baıramýkov Islam aǵamyzdyń ózi bir tóbe. Bastysy ult, el janashyry. Al qazirgi bas bapkerge keletin bolsaq, myqty bolsa nege óziniń kásipqoı bapkerligin Japonıady, AQSH-ta, Latvıady, Reseı Federasıasynda qalyń elge dáleldemegen? Sol kisiniń arqasynda jerge qarap, Rıo olımpıadasynda júldesiz qalǵan bizdiń palýandar bolǵany ma? Nátıjesiz bapkerge qomaqty qarjy tólep júldesiz qalǵansha, azyn-aýlaq aqshany qanaǵat tutyp, Otanymyzdyń dańqy úshin eren eńbek etken ózimizdiń bapkerlerge nege tabystamaǵan eken Olımpıada oıyndaryn? Rıodaǵy keleńsiz jaǵdaılardan keıin Kúres federasıasy barlyǵyn jónge keltiredi degen senimdemin» - degen oıyn bólisken sportshy.
Sondaı-aq Tańatarov Rıo Olımpıadasynda qazaq palýandary úshin Olımpıadanyń nátıjesiz aıaqtalaryn sezgenin aıtady.
«Qazaq palýandary úshin Olımpıada oıyndarynyń dál osylaı nátıjesiz, júldesiz ótetinin ishim sezgen edi. Medal túgili, qyzyqty jan túrshigerlik kúres kórmedik bul joly. Erkin kúrestiń shyrqyn buzǵandaı. Qazaqstan quramasynyń bapkerlerine qarasań qarnyń ashady. Federasıa músheleri men bas bapker endi qalaı aqtalar eken? Bálkim palýandarymyzdyń bolashaǵyna balta shappaı, óz laýazymdaryn bilikti mamandarǵa berer. «Ózge elde sultan bolǵansha, óz elińde ultan bol» demekshi bas bapker óz Otanyna oralǵany jón shyǵar. Árıne eger ol jaq qushaq jaıa qabyldasa. Jalpy, elimizdiń palýandaryna esh qarsylyǵym joq. Sol palýandarǵa jol siltep, jeńiske jeteleı almaıtyn bapkerlerden ne paıda?» - deıdi.
Sonymen birge Qazaqstannyń tórt dúrkin chempıony sportshylarǵa emes, bas bapkerge kóńili tolmaıtynyn da jetkizdi.
"Bile bilgen adamǵa, men bul postty palýan dostarymdy ǵaıbattaý úshin emes, ómirin kúreske arnaǵan, taǵdyryn kúrespen baılaǵan dostarymnyń eren eńbegin esh qylǵan bas bapker men federasıa músheleri jaıynda sóz qozǵaǵam. Bas bapkerimiz bildeı eki dúrkin Olımpıada chempıony, dańqty sportshy bola tura palýandarymyzǵa durys taktıka qoıa bilmedi. Shyndyqty aıtqannyń aıyby joq. Aıtpaıyn desem palýandarymyz úshin ishim kúıip barady" - jazǵan Aqjúrek Tańatarov.
Aıta keteıik, kúresten Qazaqstan quramasynyń qazirgi bas bapkeri Sergeı Beloglazov eki márte Olımpıada chempıony, alty dúrkin álem chempıony atanǵan, KSRO-nyń eńbek sińirgen sport sheberi. Onyń daıyndaǵan palýandary Rıodaǵy boz kilemde bedeldeskenderiniń barlyǵynan jyǵylyp qaldy.
