Kúzdiń qara sýyǵynda dalada qalǵan otbasynyń basqa amaly qalmapty dep habarlaıdy,-  Qamshy.kz  31 arnaǵa silteme jasap.

Joqshylyq júıkesin juqartqan Janar bes kúnnen beri alty balasymen jataqhananyń yǵynda jansaqtaýǵa májbúr. Bes kúnnen beri balalary sabaqqa barýdan da qalǵan. Sońǵy ret qashan toıa tamaq ishkenderi de esinde joq.

"Dalada túnep jatyrmyn. Balalarǵa keshke magazınnen nanyn sýyn ákep berem. Tamaqta ishken joq. Baratyn jerim joq. Eshkim meni kirgizbeıdi. Qaıda baram men?", - deıdi «Kúmis alqaly» ana Janar Qýandyqova.

Barar jer, basar taýy qalmaǵan jalǵyz basty ana balalarynyń densaýlyǵyna alańdaıdy. Kúzdiń yzǵarly túninde tońǵan kenjesine sýyq tıip qalypty. Jupyny ómir júdetken jetkinshekter tońbaı jatýdy armandaıdy. Páter aqyny tóleı almaǵanymyz úshin úı ıesi baspanadan qýyp shyqty deıdi. Dalada qalatyn bolǵandyqtan járdem suraı jergilikti bılikke júginipti.

"Úıden qýyp jatyr dep aldyn ala barǵanmyn. Ákimdiktegiler qaramaı qoıdy da shyǵaryp saldy. Keshe baryp em jazyl dedi ákimge, keıin ózimiz zvondaımyz dedi. Men ol ýaqytqa deıin dalada jatpaıtyn shyǵarmyn?", - deıdi «Kúmis alqaly» ana Janar Qýandyqova.

Qala basshylyǵy bul otbasyǵa birden básirelep berer baspana joq dep kesip aıtty. Biraq bılikke ókpesi orynsyz deıdi. Buǵan deıin qoǵamdyq jumyspen qamtamasyz etkenderin alǵa tartady. Kelisimshart ýaqyty kelgen soń jumystan shyǵyp qalypty. Keıin basqa turaqty jumys usynǵan. Biraq ana bas tartty deıdi.

"Baspana máselesin aıtsaq ol kisige qazirgi tańda ákimdik tarapynan barlyq jaǵdaı jasalyp, Tólebı kóshesiniń boıyndaǵy jataqhanadan bólme izdestirilip jatyr. Qystyq merzimge ýaqytsha bolsa da beriledi", - deıdi Taraz qalasy ákimdiginiń baspasóz hatshysy Gúlbahram Dúısekova.

Shendiler jesir áıeldiń jaısyz otbasy retinde tirkeýde turǵanyn aıtady. Bılik tarapynan bar kómekti kórsettik deıdi. Biraq bul otbasyǵa bir baspana buıyrmaı-aq tur.