Jýyrda aqparat quraldarynda qytaı kásipkeriniń óziniń týǵan aýylynda eski úılerdiń ornyna jańa baspana turǵyzyp, aýyldastarynyń rızashylyǵyna bólengeni týraly jańalyq tarady. Osy jańalyq jarıalanǵan saıttyń birine bir oqyrman «Bul sıaqty búkil aýylǵa jaqsylyq jasaý degen bizdiń olıgarhtardyń túsine qorqynyshty oqıǵa bop kiretin shyǵar» dep jazypty oryssha. Atalmysh jańalyqty oqyp otyryp, meniń esime mynandaı oqıǵa tústi. 

Meniń de kókem álgi qytaılyq kásipker sıaqty olıgarh. Biraq úıine jan jolatpaıdy. Bala-shaǵasynyń týǵan kúnine de eshkimdi shaqyrmaı, ózderi jeke otyryp jasaıdy. 2000 jyldardyń ortasy edi. Uıaly telefondar qoǵamǵa endi ene bastaǵan. Meniń uıaly telefonym joq bolatyn. Alýǵa asyqpaǵanmyn da. «Oqýymdy bitirip, qyzmetke ornalasqan soń alarmyn» dep oılaıtynmyn.

Birde álgi kókemniń áıeli meni úıine shaqyrdy: «Tez kel. Saǵan syılyǵymyz bar» dep. «Ómirinde eshkimge  eshnárse berip kórmegen edi. Maǵan qalaı ǵana syılyq jasamaq?» dep oıladym. Biraq kóńilime esh kúdik almastan úıine bardym. Esikti ashqan jeńgemiz «Mine saǵan uıaly telefon, aǵań syılap otyr» dedi. Jalpy ózim tehnıka, akssesýar ataýlyǵa asa qumar emespin. Hal-jaǵdaıdy surasqan soń bergen zatyn selqos túrde sómkeme saldym da shyǵyp kettim. (Olar úıinde uzaq bógelýdi unatpaıtyn).

Oıymda dáneńe joq óz úıime kelip, «uıaly telefon» dep bergen qorapshany shkapqa sala saldym. Ańqaýlyǵym ba, nege ekeni ashyp qaramappyn da. Sodan bir kún ótkende  jeńgem habarlasty úıge. «Sen keshegi «sotkany» bireýge satyp jibergen joqsyń ba?» Ań-tań boǵan men «Joq, qorabyn ashyp ta qaramadym áli» dep shynymdy aıttym.

Kókem barlyq máseleni jeńgemiz arqyly sheshetin. Sol kúni tús aýa jeńgem taǵy habarlasty: «Sotkany» satyp jibermediń be? Smotrı, satsań durys bolmaıdy». Sonshalyqty altynnan jasalǵan telefon ba edi, shynymen de qaraıynshy dep, qorapty ashtym. Sol kezdegi 1000 teńgelik arzan markaly telefon eken. Ol kezde jurt «Nokıonyń» jańa modelin alyp jatqan.  

Sodan taǵy bir kún ótkende jeńgemiz habarlasyp, «Biz bergen «sotkany» eshkimge berme» dedi qaıtadan. «Men ony áli paıdalanbadym da. Maǵan dál qazir qajeti bolyp turǵan joq. Nege suraı beresiz?» dedim. Jeńgem, «Ol Aıjannyń (3 synypta oqıtyn kishi qyzy) eski «sotkasy». Biz oǵan jańasyn áperdik. Bosqa tastaǵansha bireýge syılaýdy uıǵardyq. Kókeń «Bóten bireýge bergenshe týysymyz ǵoı, saǵan ber» dedi.

Sóıtip jeńgem maǵan bir apta boıy kún saıyn habarlasyp, Aıjannyń eski «sotkasyn» eshkimge berýge bolmaıtynyn aıtyp, ábden yǵyrymdy shyǵardy. Tipti, sizge ótirik, maǵan shyn, «Kókeń sol «sotkany» sen bireýge berip qoıa ma dep, túnde uıyqtaı almaı júr, ras aıtam. Tún ortasynda turyp alady da, «álgi sotkany anaý satyp jibergen joq pa? Bilshi» deıdi. Sondyqtan kúnde surap júrgenim» dedi. 

 Bul áýlettiń sarańdyǵyn burynnan biletinmin, biraq mol dúnıege belshesinen batyp jatqan kókemniń qyzynyń eski zatyn sonshalyqty buldaǵanyna tań qaldym, rasymen. Nalydym da.

«Men sizden eshnárse suramadym ǵoı. Shaqyryp qolyma ustatqan ózińiz. Qyzyńyzdyń eski zaty ekenin bilgende almaıtyn edim ǵoı. Men joǵary oqý ornyn bitirip jatqan bildeı bir mamanmyn. Meni kim dep tursyz?» dep, ashýymdy jasyrmadym, «sotkasyn» ózine qaıtaryp turyp.

Sodan keıin men bul úımen múldem qatyspaıtyn boldym. Jeńgemiz el bir bólke nanyn áreń taýyp júrgen 90 jyldary shet eldiń shıpajaılarynan shyqpaýshy edi. Qazir de aıdaǵy otyz kúnniń jıyrmasyn alystaǵy teńiz jaǵalaýlarynda ótkizedi. El bir kólik alý úshin jyldap aqsha jınasa kókemniń áıeli on bes kún saıyn aýystyrady avtokóligin. Bireýge ótirik, al kózimen kórgen janǵa shyn.   

Iá, olıgarhtar týraly jańalyq estisem, esime álgi eski «sotka» túsedi.

Aıǵanym,

Almaty