Bıyl Amerıkanyń eks prezıdenti 70-ke toldy. Osyǵan baılanysty «Gazeta.ru» portaly Bıll Klıntonnyń burynǵy kóńildesi Dollı Kaılmen júrgizgen suhbatty jarıalady. Dollı Kaıl jýyrda «Hılları. Bóten áıel» dep atalatyn kitap jazyp shyǵarǵan.  

Dollı Kaıl Bıll Klıntonmen bir mektepte oqypty. Olardyń jaqyn qarym-qatynastary tek 1970 jyly bastalyp, 1992 jylǵa deıin sozylǵan. Ol buǵan deıingi kitabynda áıel advokat pen gýbernator erkektiń qarym-qatynasy týraly jazǵan. Jurtshylyq Dollı kitaptarynda Klıntondy keıipker etip alǵan degen pikirde.  

Óziniń Klıntonmen jaqyn bolǵanyn joqqa shyǵarmaıtyn Dollı suhbatynda Klınton óz áıelin unatpaıdy degen pikir bildiredi. Bıll men Hılları súıip qosylǵan emes, tek saıası jaqtastar deıdi ol. Klıntonnyń kóńildesiniń oıynsha, Hılları  kúıeýiniń jarqyn bolashaǵyn aldyn ala bilip, ony Aq úıge kirý úshin paıdalanǵan. Dollı Bıll Klınton qalaǵan nársesine qol jetkizetin maqsatshyl adam dep baǵalaıdy.  

Dollı sondaı-aq, kóptegen erkekter ózderiniń anasyna uqsaıtyn jar izdeıtinin aıta kele, Hılları Bılldiń anasyna múlde uqsamaıdy deıdi. Biraq ol anasy sıaqty oǵan kómektesetin. Hılları kúıeýine qarjylaı da kómek kórsetken. Hılları Bılldiń ájesi sıaqty, ony ashsa alaqanynda jumsa judyryǵynda ustaǵan, óte yqpaldy áıel.

«Eger men Hıllarıdiń ornynda bolsam, basqasha áreket eter edim. Árıne men burys áreketten adamyn degen sóz emes. Biraq men olardyń keıbir áreketterin qaıtalamas edim. Mysaly, jaýdyń sońyna túsýdiń qajeti joq. Eger siz maıdanda jeńýdi oılasańyz, adal jolmen áreket etińiz. Al Hılları úshin eshqandaı ereje joq».

Dollı, sondaı-aq eger ol Hıllarıdiń ornynda Bılldiń áıeli bolsa, onda Klınton Prezıdent bolýdan góri kóp balaly otbasynyń ákesi bolýy múmkin edi deıdi. Klıntonnyń burynǵy «kóńildesi kúıeýim bóten áıelge barǵanyn bilsem ol áıelge tarpa bas salmaı, kúıeýimdi kináli sanar edim» degen pikirde.

Dollı Kaıl Bıll Klınton joǵary mansapqa jetken qaltaly azamat bolsa da ishteı baqytsyz dep esepteıdi. Óıtkeni Dollıdiń oıynsha, Klınton óziniń potensıalyn júzege asyra almaı, áıeline baǵynyshty bop qalǵan. 

Dollı Hılları Klıntondy jasandy áreket ıesi dep aıyptaıdy. «Kúlkisi de jasandy» deıdi. «Ol qansha jerden kúıeýi sıqáty bolýǵa umtylsa da dál Bıll Klıntondaı bola almaıdy».  

Burynǵy kóńildes sondaı-aq Bıll Klınton onyń janyn aýyrtatyn talaı nárse istese de bárin umytyp, kek saqtamaıtynyn aıtady.

Ázirlegen Aıǵanym Birtýar