Anadolyǵa at basyn tiregen halqymyzdyń ardaqty uly, aqıyq aqyn Muhtar Shahanuly Ankarada jurtshylyqpen júzdesý ótkizdi. Kelisti kezdesý, ásirese Túrkıa Respýblıkasynda bilim alyp júrgen jalyndy jastardyń rýhanı ómirinde aıryqsha oryn aldy.
«Ankara Qazaq Jastary» birlestiginiń uıytqy bolýymen uıymdastyrylǵan júzdesýge túrki áleminiń tutastyǵy úshin ter tógip júrgen qoǵam jáne qalam qaıtarkerleri men ǵalymdar, memlekettik emes uıymdar músheleri jáne de aqynnyń otty jyrlarymen tárbıelengen bilimger jastar qatysty.
Ardaqty ǵalym, Chankaıa ýnıversıtetiniń ulaǵatty ustazy Mahır Nakıp myrza basqosýdy resmı túrde ashyp, Muhtar aǵamyzdyń túrki dúnıesiniń rýhanıaty men álemdik ozyq oı keńistigindegi ózindik ornyna keńinen toqtaldy. «Túrki Álemi Zıalylar Odaǵynyń» tóraǵasy retinde de Muhtar Shahanulynyń tarıhı sebeptermen arasy ajyraǵan týystastardyń tutastyǵyna zor úles qosyp, ortaq rýhanıatymyzǵa úlken olja salatynyna kámil senetinin jetkizdi.
Muhtar Shahanuly óz kezeginde qazirgi tańdaǵy ózekti máselelerdi aýqymdy taldap, olardy sheshý joldaryn keńinen túsindirdi. Kúreske toly ómir jolynyń bel-belesterinen taǵylymdy tustaryn tiriltip, esti estelikter aıtty. Kesek jyrlaryn shabyttana oqyp, qordaly máseleler týrasynda qoıylǵan saýaldarǵa tushshymdy jaýaptar berdi. 
Sazgerlik qyry kóp aıtyla bermeıtin Muhtar aǵamyzdyń «Qazirgi shynshyldyq ólshemi» atalatyn sıasy keppegen jańa áni kezdesý barysynda oryndalyp, jurtshylyq kóńiline uıalaǵan tyń týyndy án álemine qanat qaqty.
Kezdesý qorytyndysynda Muhtar Shahanulyna jahandaný dáýirinde óskeleń urpaqty rýhsyz qıratqysh kúshterden aıbyndy kúresker retinde qorǵaýdaǵy kóshbasshylyǵy men qajyrly qaıratkerligi jáne de jastardy otanshyldyq rýhta tárbıeleý isine qosqan asa zor úlesi úshin uıymdastyrýshylar tarapynan Alǵys hat tapsyryldy. Sonymen qatar, júzdesýge jıylǵan jurtshylyqtyń aıryqsha qurmetiniń belgisi retinde qadirmendi qonaqtyń ıyǵyna oqaly shapan jabylyp, syı-sıapat jasaldy.
Kórnekti memleket jáne qoǵam qaıratkeri, arqaly aqyn Muhtar Shahanulymen ótken jarqyn júzdesý júrekterge jol tartty jáne de jurtshylyq úlken bulaqtan sarqylmas nár alyp, shalqar shabytpen tarqasty.
Myrzahan Baıbolov,
Gazı ýnıversıtetiniń doktoranty
"Qamshy" silteıdi
