«Qamshy» portaly 27 qazan kúni «Din qyzmetkeri: Oramal taǵýǵa tıym salsa, balıǵat jasynda qyzymdy mektepten shyǵaryp alam» atty materıal jarıalaǵan bolatyn(Portal materıaldy jarıalaý aldynda óziniń erkin oı minberi ekenin eskertýdi umytpaǵan). Onda, Materıalǵa túrtki bolǵan Jasulan Júsipbekov esimdi azamattyń(dinustanýshy), Qazaqstan zańnamasyna sáıkes dinı baǵyttaǵy kıimderdi mektepke kıýge tyıym salý máselesine qarsy shaıǵat úkimin alǵa tartyp, jasaǵan vıdeo úndeýi bolatyn. Eske salsaq, Qazannyń 19-y kúni Qazaqstannyń úsh birdeı mınıstrligi: bilim jáne ǵylym, ádilet, din jáne azamattyq qoǵam mınıstrlikteri Qazaqstan zańnamasyna sáıkes dinı baǵyttaǵy kıimderdi mektepke kıýge tyıym salynǵanyn málimdegen edi.
Júsipbekov úndeýinde halyqty atalǵan zańdy oryndatpaý týraly bılikke talap qoıatyn petısıaǵa shaqyrǵan. Alaıda, Redaksıaǵa habarlasqan Júsipbekov, vıdeomaterıaldy jarıalaýǵa ruqsatyn almaǵymyzdy alǵa tartyp, maqalany alyp tastaýymyzdy surady. «Youtube» ashyq vıdeohostıngindegi «Tamshy Islamdyq portaly» degen atpen tirkelgen kanalda jarıalanǵa beıneúndeý de kóp ótpeı alynyp tastalypty. «Qamshy» portalynda atalǵan materıal bir táýliktiń ishinde kóp talqylanyp, 80-ge jýyq pikir jazǵan bolatyn. Qazaqstan Respýblıkasynyń Atazańynda eldiń zaıyrly el ekeni týraly aıqyn bap bar.
«Qamshy» portaly vıdeomaterıaldyń quqyǵyna qol suqpaı, oqyrmandaryna úndeý mazmunyn jazbasha usynady. Damýshy 30 eldiń qataryna umtylǵan Qazaqstanda oramal máselesi nege kóp talqylandy? Siz ne deısiz, qadirli oqyrman?
***
«Qurmetti musylman baýyrlar, qazirgi kúnde kóterilip jatqan eń úlken másele áıel adam uıatty jerlerin, áýret jerlerin jaýyp júrý máselesi. Ol, oramalmen jaba ma, arabsha aıtqanda hıdjappen, qazaqsha aıtqanda kımeshekpen jaba ma, álde sporttyq kıimmen jaba ma, matamen jaba ma qandaı da materıalmen áıel adamnyń uıatty jerin jabýy halyqtyń arasynda, musylmandardyń arasynda, úkimettiń arasynda qatty kóterilip jatyr. Osyǵan qysqasha toqtala ketsek:
Birinshiden, áıel adam balıǵat jasyna tolǵanda eki qoly men betinen basqa jerin jabýy paryz. Bul, Allanyń ámiri. Quranda keledi. Alla taǵala buıyrǵan paryz nárse basqa bireý paryz emes dep joqqa shyǵaratyn bolsa, onda, ol adam dinnen shyǵady, kápir bop ketedi. Al, eger moıyndap turyp, «men bilem ǵoı paryz ekenin, biraq taǵa almaımyn, taqpaımyn qandaı da bir sebeppen» dese, onda, ol adam dinnen shyqpaıdy, biraq kúnáhar bolady deıdi ǵalymdar. Sondyqtan, Úkimettiń, mınıstrliktiń mektepterde, basqa da organdarda «oramal taqqyzbaımyz» degeni tikeleı dinge qaıshy. Imam Tahaýıdyń «biz basshyǵa buısunamyz» dep aıtqan sózi bar. «Basshyǵa buısuný ýájip, tek Allanyń ámirine qarsy kelmeıtin máselelerde» deıdi. Mysaly basshymyz, dinge, quran-hadıske qaıshy iske buıyrsa, ıaǵnı, araq ish dep buıyryp jatsa, zına jasa dep buıyryp jatsa, oramal taqpaısyń, áýretińdi jappaısyń dep buıyryp jatsa onda ol jerde adamnyń ámiri emes Allanyń ámiri birinshi orynǵa qoıylady. Úkimet bastap otyrǵan oramal taqqyzbaý máselesi qolǵa alynsa, men balıǵat jasyna tolǵanda qyzymdy mektepten shyǵaryp alamyn. Óıtkeni, Allanyń ámiri birinshi oryndalady. Al, basshylyqtyń aıtqany Alla ámirine qaıshy kelmese ǵana oryndalady. Iaǵnı, osy máselede Allanyń ámirine qarsy kelgendikten basshynyń ámirine buısunylmaıdy.
Imam Tahaýı ashyp aıtqan: «Basshylar zulymdyq qylsa da biz oǵan buısunamyz. Oǵan sabyr, taýpıh ber, týralyq ber dep duǵa qylamyz, Allanyń ámirine qarsy jumsasa buısunylmaıdy» dep.
Ekinshiden, Osy máseleni kóterip, Elbasynan, eldiń basynda otyrǵan aǵalardan kómek surap, jer-jerden qol jınap petısıa uıymdastyramyz. Osyny iske asyrmaýyn, musylmandar quqyǵyn qorǵaýyn talap etemiz. Oblystarda, aýdandarda zańgerlerdi tartyp, azamattardy petısıaǵa qol qoıýǵa shaqyramyz. Buny musylmandar quqyǵyn qorǵaý dep túsinýimiz kerek. Sharıǵat sheńberinen, zań sheńberinen shyqpaýymyz kerek. Ata zańymyzben sharıǵatymyz qaıshy kelip qalǵan jaǵdaıda baıbit jolmen, el aǵalaryna hat jazý arqyly quqyǵymyzdy qorǵap qalýǵa at salysaıyq».
