"Biryńǵaı jınaqtaýshy zeınetaqy qory" aksıonerlik qoǵamy basshylyǵy tutqyndaldy, dep habarlaıdy "Qamshy" portaly Tengrinews.kz-ke silteme jasap. 

"Olar Jańa jyldyń aldynda qamaýǵa alynǵan. Aty-jónderin bilmeımin, biz olardy atamadyq. Jetekshi men orynbasarlarynyń biri qamaýǵa alynǵan", - dedi QR Ulttyq bankiniń qarjy qyzmetteri tutynýshylarynyń quqyǵyn qorǵaý departamentiniń dırektory Aleksandr Terentev.

Aıta keteıik, Terentev 6 qańtardaǵy baspasóz máslıhatynda BJZQ-ǵa qatysty qylmystyq istiń Ulttyq banktiń ótinishinen keıin qozǵalǵanyn málimdegen.

Eske salaıyq, 2016 jyldyń 21 jeltoqsanynan bastap QR Ulttyq bankiniń qatysýymen "Biryńǵaı jınaqtaýshy zeınetaqy qory" Aksıonerlik qoǵamynyń qyzmetine tekseris júrgizilgen bolatyn. Sol kezde tekseristiń BJZQ aksıonerlik qoǵamynyń menshikti aktıvterdi ınvestısıalaýǵa qatysty jasalǵan operasıalary boıynsha júzege asyrylyp jatqany aıtylǵan edi. "BJZQ" AQ-tyń menshikti aktıvteri onyń kapıtaly jáne sharýashylyq qyzmetiniń nátıjeleri esebinen qalyptastyrylady eken. "BJZQ" AQ menshikti aktıvterdi derbes basqarady", - degen edi banktegiler.

"Azamattardyń zeınetaqy jınaqtary "BJZQ" AQ-tyń balansynan bólingen jáne bólek eskeriledi. Ulttyq Bank zeınetaqy jınaqtaryn ınvestısıalaýdy Qazaqstan Respýblıkasynyń Ulttyq qoryn basqarý jónindegi keńes maquldaǵan 2016 jylǵa arnalǵan baǵyttar boıynsha ǵana júzege asyrady. Bul rette 2016 jyly zeınetaqy aktıvterin ekonomıkanyń naqty sektorynyń jeke kompanıalarynyń qarjy quraldaryna ınvestısıalaý kózdelmeıdi", - delingen edi UB habarlamada. 

Al, Kapital.kz jazýynsha, ustalǵandar  BJZQ-nyń basqarma tóraǵasy Rýslan Erdenaev jáne onyń bir orynbasary bolǵan.