QR UQK-nyń eks-basshysy Nartaı Dútbaev eki aıǵa qamaýǵa alyndy dep habarlaıdy tengrinews.kz.

"Astananyń Esil aýdandyq №2 sotynyń 2016 jyldyń 28 jeltoqsanyndaǵy qaýlysymen Dútbaev Nartaı Nurtaıulyna, Hasen Nurlan Bolatulyna, Nurtaev Erlan Súıimbaıulyna qatysty eki aıǵa qamaýǵa alý túrindegi bultartpaý sharasy tańdaldy", - delingen redaksıanyń resmı saýalyna Astana sotynyń bergen jaýabynda.

Onyń ustalǵany jaıly 2016 jyldyń 28 jeltoqsanynda belgili bolǵan. "Júrgizilgen jedel izdestirý is-sharalary barysynda 2016 jyldyń 26 jeltoqsanynda Qazaqstan Respýblıkasynyń Qylmystyq kodeksi 185-babynyń 3-bóliminde ("Memlekettik qupıalardy jarıa etý") jáne 362-babynyń 3-bóliminde ("Bılikti nemese laýazymdyq ókilettikterdi asyra paıdalaný") kózdelgen qylmystardy jasaýǵa kúdiktiligi boıynsha Dútbaev Nartaı Nurtaıuly, Hasen Nurlan Bolatuly jáne Nurtaev Erlan Súıimbaıuly ustaldy", - delingen edi QR UQK habarlamasynda.

Sonymen qatar, osy atalǵan tulǵalardyń Qazaqstan Respýblıkasy Qylmystyq-prosestik kodeksiniń 128-babynyń tártibinde UQK ýaqytsha ustaý ızolátoryna qamalǵany habarlandy. Kúdiktiler men olardyń týystarynyń turǵylyqty meken-jaıy boıynsha tintý jumystary júrgizildi, zattaı aıǵaqtar tárkilendi. 

Aıta keteıik, Nartaı Dútbaev 2001-2006 jyldar aralyǵynda UQK tóraǵasy qyzmetin atqarǵan bolatyn.