Polshanyń Aýyr atletıka federasıasy óziniń resmı saıtynda Shımon Koleskıdiń  94 kelige deıingi salmaqta Beıjińde 2008 jyly ótken Olımpıadanyń jeńimpazy retinde resmı moıyndalǵanyn rastady, - dep habarlaıdy tengrinews.kz , Vesti.kz saıtyna silteme jasap.

23 qarashada Halyqaralyq olımpıada komıteti qazaqstandyq Ilá Ilındi 2008 jáne 2012 jylǵy Olımpıada oıyndarynyń altynynan aıyrǵany habarlanǵan bolatyn.

Polshanyń aýyr atletıka federasıasynyń málimdemesinde Koleskıdi Olımpıada chempıony retinde moıyndaý týraly sheshimdi jarty jyl kútý kerek bolǵany aıtylǵan. Sonymen birge, altyn júldeni sportshynyń áli almaǵanyn, biraq, HOK pen Aýyr atletıkanyń halyqaralyq federasıasy hattamasynda jeńimpaz retinde Koleskıdiń kórsetilgeni de habarlandy. 

"Árıne, barlyǵyn osy jetistikpen quttyqtaımyn, degenmen, Olımpıadanyń júldeleri bizge óte bir túsiniksiz jaǵdaıda kelip jatqanyn moıyndaý kerek. Kim biledi, múmkin, Halyqaralyq dopıngke qarsy agenttik (WADA), HOK jáne IWF prosedýralarynan keıin júldelerdi ózgelerge taratyp bermeı, dopıngpen ustalǵandardyń oryndaryn "bos" qaldyrǵan durys bolar ma edi. Endi segiz jyldan keıin Rıo-de-Janeırodaǵy jarystar týraly bizdiń de osyndaı jaǵdaıǵa tap bolyp otyrýmyz múmkin..." - delingen Polshanyń Aýyr atletıka federasıasynyń habarlamasynda. 

Aıta keteıik, 2004 jylǵy Afınadaǵy Olımpıada oıyndary kezinde 35 jastaǵy Koleskı sport jolynda ekinshi ret dopıngpen ustalyp, bir jylǵa shettetilgen bolatyn.

Eske salaıyq, 23 qarashada Qazaqstan Respýblıkasy Ulttyq Olımpıada komıteti Halyqaralyq Olımpıadalyq komıteti tarapynan 2008 jáne 2012 jyldardaǵy Olımpıada oıyndaryna qatysqan qazaqstandyq sportshy Ilá Ilınge qatysty aǵzasynan tyıym salynǵan preparattardyń izi tabylǵandyqtan, jaza qoldanylǵandyǵy týraly resmı habarlama alǵan bolatyn.

Al keıin Qazaqstannyń Aýyr atletıka federasıasy júldelerinen aıyrylǵan Ilá Ilınge baılanysty jaǵdaı týraly málimdeme jasaǵan edi. 

Munyń aldynda HOK Svetlana Podobedova, Zúlfıa Chınshanlo men Maııa Manezany dopıng synymylary rastalǵannan keıin 2012 jylǵy Olıpıadanyń altynynan aıyrǵan, al erkin kúres palýany Taımýraz Tıgıevti 2008 Olıpıadanyń kúmis júldesinen aıyryp, Almas Óteshiovtyń nátıjesin joıǵan bolatyn. Keıin taǵy bes sportshy Marıa Graboveskaıa (75 keliden joǵary kategorıada qola medal alǵan), Áset Mámbetov (96 kelige deıingi salmaqta qola medal alǵan), Maııa Maneza (týrnır bastalmaı turyp, jarystardan shyǵyp qalǵan), Irına Nekrasova ("63 kelige deıingi salmaqta kúmis medal enshilegen) jáne Vladımır Sedovtardyń (85 kelige deıingi kategorıada tórtinshi oryn alǵan) jetistigin joıý men jarystan shettetiletini týraly habarlanǵanbolatyn.