Qazaqstan Respýblıkasy Sırıa Arab Respýblıkasynyń halqyna 500 tonnaǵa jýyq un, et konservteri, kúrish, makaron men shaı mólsherindegi gýmanıtarly járdemin jetkizdi dep habarlaıdy QR SİM Baspasóz qyzmeti.

Gýmanıtarly júk sırıalyq Tartýs portyna Reseı Federasıasynyń yqpaldasýymen jetkizildi. Qazaqstannyń Iordanıadaǵy Elshisi Azamat Berdibaı tapsyrǵan gýmanıtarly járdemdi sırıalyq taraptan Tartýs provınsıasy Keńesiniń tóraǵasy Iaser Dıbba qabyldady.

Qazaqstannyń gýmanıtarly járdemin qajettengen sırıalyqtarǵa taratý Sırıaǵa kómek kórsetý jónindegi joǵarǵy komısıa qadaǵalaýymen júzege asyrylatyn bolady.

«Sırıadaǵy aýqymdy gýmanıtarly daǵdarysty esepke ala otyryp, bul elge gýmanıtarly járdemdi kórsetý jónindegi sheshimdi Qazaqstan Respýblıkasy Prezıdenti Nursultan Nazarbaev qabyldady», - dedi A. Berdibaı.

Bul Qazaqstannyń Sırıa halqyna kórsetip jatqan tuńǵysh kómegi emes. 2012 jyly bosqyndar lagerlerinde ornalasqan sırıalyqtarǵa gýmanıtarly járdem retinde Islam Yntymaqtastyǵy Uıymy arqyly Qazaqstan Iordanıa men Lıvan úkimetterine 400 myń AQSH dollaryn bólgen.

Sondaı-aq, 2015 jylǵy qazanda Astanada ótken sırıalyq opozısıa ókilderi arasyndaǵy kelissózderden keıin Túrkıa-Sırıa shekarasynda shoǵyrlanǵan sırıalyq bosqyndarǵa farmasevtıkalyq, azyq-túlik jáne turǵyn máselelerin jaqsartý úshin sırıalyq bosqyndarǵa Qazaqstan 300 myń eýro kóleminde gýmanıtarly járdem berýi týraly Memorandýmǵa qol qoıylǵan.