Keshe, «Qamshy» portalynda «Quran aqysyn Qudaı atynan talap ketken ımam qul ekenin umytty» atty materıal jarıalanǵan bolatyn.

Ganúshkın selosyndaǵy «Temiráli» meshitiniń dinı qyzmetkerine qatysty materıalda ımam men ony shaqyrǵan as ıesiniń jazysqan skrınshoty jarıalanǵan edi. Onda  Qurmanǵazy aýdany Ganúshkın selosyndaǵy meshittiń ımamy delingen adamnyń asqa baryp, aqsha ala almaǵany, sosyn as ıesine messendjer arqyly aýyr sóz jazyp, qurandy buldaǵany kórinedi. Bul óz kezeginde áleýmettik jelide qatty talqylandy.

«Qamshy» portalyna osy máselege baılanysty Atyraý oblysynyń turǵyndarynyń birinen arnaýly hat kelip tústi. Aty-jónin jarıalamaýdy ótingen azamat atalǵan oqıǵa boıynsha óz túsiniktemesin  bere kele, as ıesine bulaı hat jazǵan adamnyń bekitilgen ımam emes ekenin, ımam joq kezde ornyna qyzmet etetinderdiń biri ekenin baıandady. Sondaı-aq, osy máseleniń Islam dinine kóleńke túsire almaıtynyn aıtty. Hat ıesi musylman qaýymdy atalǵan máseleni dabyra qylmaı, túrli dinı alaýyzdyq órship turǵan zamanda bereke-birlikte bolýǵa shaqyrdy.