Astanaǵa kirýdi aqyly etý keıinge qaldyryldy. Bul týraly halyqqa esep berý kezdesýinde Astana ákimi Áset Isekeshev málimdedi, - dep habarlaıdy Tengrinews.kz tilshisi.

Isekeshevtiń aıtýynsha, bundaı sheshimniń qabyldanýyna  halyqtyń ótinishteri men eskertýileri negizge alynǵan.

Halyqtyń pikirin esepke ala otyryp, qalaǵa kirýdi aqyly etýdi jáne Abylaı han men Shákárim Qudaıberdiuly dańǵyldarynda bir baǵyttaǵy qozǵalysty engizýdi keıinge qaldyrdyq", - dep málimdedi elorda ákimi.

Eske salaıyq, 2017 jyldyń 21 mamyrynan bastap qarbalas sátte qalaǵa kirý aqyly bolatyny aıtylǵan edi. Sondaı-aq, jol kartasynyń josparyna sáıkes, saǵat 7.00-den 10.00-ge deıin myna alty baǵyt boıynsha: Kókshetaý, Qostanaı, Pavlodar, Qaraǵandy, Qosshy jáne Qorǵaljyn aqyly bolatyny habarlanǵan edi.