«Úıden shyqqanda balanyń jylaǵan daýsyn estidim. Kórshiniń balasy dep oıladym. Syrtta turǵan kóligime bettegende jerde otyrǵan balany baıqadym. Kúrteshesine hat qystyrylǵan.

Onda «Aty Zere. Bir jas úsh aı. Bir aıdan keıin alyp ketemin Eshkimge habarlaspańyzdarshy» — dep oryssha jazylǵan». Bul týraly bizge Jambyl oblysy Merki aýylynyń turǵyny habarlady, dep jazady  jasqazaq.kz

Atyn jasyryp qalǵan azamatsha, oqıǵa Mánshúk Mámetova kóshesinde ornalasqan úıdiń aýlasynda bolǵanyn aıtty. Bir jastan asqan náresteni belgisiz bireý tastap ketken. Tótenshe oqıǵa 14 aqpan kúni saǵat keshki 22.00 taman oryn alǵan.Úı qojaıyndary birden jergilikti tártip saqshylaryna habar beredi. Olar kelip, kórshilerden surastyrady. Qarama-qarsy úıde beınekamera ornatylǵan. Onda jas qyzdyń 21.48-de qaqpadan kirgeni kórsetilgen. Biraq túri kórinbeıdi. Jol boıynda turǵan taksıstiń biri kókek anany Almaty-Tashkent tas jolynyń boıyna jetkizgenin aıtqan. Naqty qaı baǵytqa ketkeni belgisiz. Bala bir jastan endi asqan bolsa da «mama, mama» dep anasyn qaıta-qaıta izdeıdi.

Eldos Ómirzaq