Tanymal akter Táýekel Músilim óziniń qylmys áleminiń serkesi bolǵan Sabyr Músilimniń uly ekenin aıtty dep jazdy el.kz. Ol bul týraly  suhbatynda baıandaǵan.

Ol óziniń shyǵarmashylyǵyna toqtalyp, "Anamdy izdeımin" dep atalatyn fılmge túsýi jaıynda áńgimelep berdi. Osy tusta óziniń otbasy, naqtyraq aıtsaq ákesi jaıynda da sóz qozǵady.

el.kz tilshisiniń «qylmys áleminiń sózimen aıtqanda «vor v zakone» etip taǵaıyndalǵan, 90-jyldary krımınaldyq «avtorıtet» bolyp tanylǵan Sabyr Músilim sizdiń ákeńiz ekeni ras pa?» degen suraǵyna jaýap berdi.

- Iá, ákem batyr adam edi... Ol kisimen kezdesken saıyn ulttyq namys týraly aıtatyn. Keıde ózge ulttyń ókilderi qazaq qyzdarymen kóńildes bolyp, qoǵamdyq oryndarda daıashylardy basynyp, daýys kóterip jatqanyn kóresiń. Bizdiń ákelerimizdiń kezinde mundaı tártipsizdik bolmaıtyn edi. Nege óz elimizde ózimiz ógeı bala bolyp, kóshe sypyryp, qara jumys isteımiz? Nege ózge ult kelip oıyna kelgenin jasaıdy? Qonaq árqashan óz ornyn bilýi kerek.

Qazaq jeri aspannan túsken joq. Qazaqtyń qanymen, janymen kelgen jer. Qazaqtyń janyn eshkim túsinbeıdi. AQSH-ta bir aı bolǵanymda týǵan elimdi saǵyndym. Sher tarqatysatyn týǵan baýyryń, týǵan jeriń kerek ekenin túsindim.

Qazir batyrsymaq jigitter kóp. Olarǵa «qazaqty uryp jyq» dep aqsha berseń, urýdan taıynbaıdy. Ákem men dostary bılikke qarsy shyqqan joq, bıliktiń keı kózqarasyna kelispedi. Olar eldi tonamady, elge qamqorshy bolǵysy keldi. Mundaı azamattar ár zamanda kerek. Ultaralyq tártipti ustap turǵan sol kisiler edi.

Sonymen birge, ol ákesiniń qandaı áke bolǵanyn aıtty.

"Táýekel degen atymdy ákem qoıǵan. Taǵdyrdyń jazýymen áke men sheshem kishkentaı kezimde ajyrasyp ketti. Áke tárbıesin kórmeı óskendikten, ol kisi týraly mardymdy eshteńe aıta almaımyn. Anam bizdiń aralasýymyzǵa qarsy bolǵan joq. Áli kúnge deıin enesiniń aldyn kesip ótpeı, sálemin salady.

Toǵyzynshy synypta ákemmen úsh aıdaı birge júrdim.  Ákem sportqa jaqyn edi. Poezıany, ónerdi súıetin. Kez kelgen otyrysty jandyryp jiberetin. Maǵan únemi «oqy, keler zaman – bilimdilerdiń ýaqyty» deıtin. Rasynda, qazir – bilektiń emes, bilimniń zamany. Ol kisige uqsaımyn dep aıta almaımyn.

Keıde óz oıymdy jasyryp, úndemeı qalatyn jasyqtaý minezim bar. Ákemniń qolynda ósken bolsam, minezim basqasha bolar ma edi. Biraq ishimde bir qaısarlyq bar ekenin sezemin. Ákemniń kózin kórgen jurt «bul –Sabyrdyń uly ǵoı, tektiniń kózi» dep jatady. Áke atyna laıyq bolsam deımin", - dep syryn aıtty ol.