Mańǵystaý oblysynda 2016 jyldyń tamyz aıynda joǵalyp ketken 17 jastaǵy Amandyq Satybaldıev óli tabyldy. Bul týraly "Lada"basylymyna 16 aqpanda jigittiń týystary habarlaǵan, dep jazady tengrinews.kz
"Bizdiń týystar máıitti tanýǵa baryp keldi, ulymyzdy saýsaǵyndaǵy saqınadan tanydy. Bizge ony qamys arasyndaǵy batpaqtan taýyp alǵandaryn aıtty", - dedi Amandyqtyń ákesi.
Polıseıler ázirshe osyǵan qatysty resmı málimet bergen joq.
Amandyq Satybaldıev 26 tamyzda Mańǵystaý-5 aýylyndaǵy óz úıinen keshki ýaqytta ketip qalǵan bolatyn. Ol sol kezde qara jeıde, kók tústi shalbar jáne kók aıaqkıimde bolǵan edi.
Osyǵan deıin balanyń ákesi balasynyń úsh jyl boıy bir qyzben kezdesip júrgenin jáne qyzynan óz sezimin jasyrmaǵanyn aıtqan bolatyn. Amandyqtyń áke-sheshesi ekeýine qoldaý kórsetken, alaıda qyz jaq kelisim bermegen kórinedi.
"Onyń anasy ekeýiniń qarym-qatynasyna qarsy bolatyn. Amandyqtyń ketýinen bir kún buryn WhatsApp arqyly jazysqan, ol óziniń qyzynyń telefonyn alyp, Amandyqqa ekeýiniń aıyrylysýyn jazǵan. Alaıda meniń ulym qyzdy jaqsy kóretinin aıtyp, odan aıyrylmaıtynyn aıtqan, - degen edi Amandyqtyń ákesi Murat Ishımbekov.
Osy hat almasýdan keıin bir kún ótkende Amandyq úıden ketip qalady. Keter kúni ol WhatsApp messendjeriniń profılinde jazba qaldyryp ketken: "Bir kúni sen de meni saǵynasyń, Durys túsin osy sózdiń maǵynasyn...".
"Árıne biz balamyzdyń joǵalyp ketkeni jóninde polısıaǵa habar berdik. Amandyqtyń telefony sóndirýli", - degen edi balanyń ákesi.
