Qaraǵandy oblysynyń ákimi esebinde Aıtqoja Fazylov Oktábr aýdany atyn Álıhan Bókeıhanǵa berýdiń oryndalmaǵanyn másele etip kóterdi.
«Sizge «Joly bolmaǵan» degen at berildi. Nurmuhambed Qanatuly, Qazaqstanda ákimder prezıdentke 2000-ǵa jýyq esep beredi, 200 mıllıonǵa jýyq, 500ge jýyq qala, aýdnadar, aýyldar esep berdi. Sonyń biri bizdiń Qaraǵandy oblysy boldy.
Bizdiń jaǵdaıda shyndyqty aıtýǵa erkindik berilgen, ári qaýipsiz. Shyndyq degen sóz terorızm degen sózben para-par bolyp ketti. Eger bári jaqsy bolsa, nege eń tómengi aılyq – 28 myńdy quraıdy, adamdar 20 myńdy quraıtyn bir aılyq jalaqyǵa nege ómir súrý kerek. Halyq sizidń maǵan sóz bergenińizdi ekeýmizdiń kelisimimiz dep oılaıtyn bolar. Qańtar basynda men sizdiń blogyńyzǵa jazǵan bolatynmyn: esep berý jınalysynda maǵan sóz berińizshi dep. Sóz bergenińizge rahmet. Men bul jerde múldem basqa másele boıynsha turmyn. Nurmuhambed Ábdibekov, ár zamannyń, ár memlekettiń óz batyry bolady. Keńes úkimeti qulaǵan shaqta biz Keńes úkimetin satyp kettik. Sebebi bizdi solaı úıretti. Sebebi ol kezde ulttyń batyry óz ákesin satqan Pavlık Morozov boldy. 70 jyl buryn Keńes úkimetinde 70 mıllıon adamdy óltiripti. Al bizdiń óltirmeýimiz múmkin emes. Sebebi, qanysherdiń ózin ulttyń batyry dep atady ǵoı. Tek bir ǵana ulttyń batyryn aıta alar edim, Troskkııdi óltirgen Roman Merkader. 20 jyl qamaýda bolyp, qaıtyp keldi, sóıtip Keńes úkimetiniń batyry atandy. Máskeýdegi, Kýnsev zıratynda jerlengen. Men óz kózimmen kórdim: bul jerde Keńes úkimetiniń batyry Lopes Roman Ivaonvıch jerlengen. Al bizdiń memleket basqa, ózimizdiń qaıratkerler bar. Men eki qaıratkerdi moıyndaımyn, onyń biri – Álıhan Bókeıhanov jáne Jumabek Tashenov ekeýi de bizdiń jerlesimiz. Birneshe aı buryn Qaraǵandydaǵy Oktábr aýdany Álıhan Bókeıhanovtyń esimi beriledi degen sheshim qabyldanǵan bolatyn. Jarty jyl ótti. «Oktábr» keńes úkimeti el úshin ne alyp keldi? Azamat soǵysy, qyzyl terror, 4 mıllıon adam kóz jumdy, Qazaqstannyń ózinde 500 myń adam qaza tapty. Aqtar qyzyldarmen, qyzyldar aqtarmen soǵysty. Aqtar da, qyzyldar da qazaqtardy esh aıaýsyz óltirdi.
Qazaqtyń qanshama qaıratkerlerin jer aýdartyp jiberdi. Qaıtyp kelgenderin jazalady. Kollektıvızasıa ótkizbekshi boldy, alaıda eshqandaı kóńilge qonymdy dúnıe oılap tapqan joq. Qazaq jeri ólikterge toldy...», - dep tebirene sóıledi Aıtqoja Fazylov.
Aıta ketsek, Qyrkúıek aıynda Qaraǵandynyń Oktábrskıı aýdany Álıhan Bókeıhanovtyń esimimen atalatyn bolyp ózgerdi. 2016 jylǵy 25 qyrkúıekte bundaı jańalyqty oblys ákimi Nurmuhambet Ábdibekovtiń ózi oblysta toılanyp jatqan Álıhan Bókeıhannyń 150 jyldyq mereıtoıynda halyqqa jarıa etken edi.
Tipti Qazaqstan Respýblıkasy Prezıdentiniń Ákimshiligi Qaraǵandy qalasyndaǵy Oktábr aýdanyn Álıhan Bókeıhan atyndaǵy aýdan etip ózgertýge ruqsat berdi dep aıtylǵan oblys ákiminiń baspasóz qyzmeti habarlamasynda.
Atalǵan Oktábr aýdanynyń ákimshilik aýmaǵy Qaraǵandy qalasynyń soltústik-shyǵys bóliginde ornalasqan.
Keıinnen, jyldyń aıaǵynda Quramynda 10 múshesi bar, ózderin «Saryarqa» dep atap alǵan pikirtalas klýby Qaraǵandydaǵy kóshe attarynyń ózgerýine qarsylyq bildirdi. Pikirtalas klýbynyń múshesi Iýrıı Mırzoev «Qaraǵandy oblysynyń ákimi N.Ábdibekovtyń Á.Bókeıhanovtyń atyn Oktábr aýdanyna berý týraly usynysyna qarsymyn» degen bolatyn. Tutas halyqtyń aldynda ýáde berip, qýanyshty jańalyqpen bólisken Ábdibekov 10 adamnyń áńgimesinen yqty ma? Áıteýir árýaqty rıza qylatyn ýádesin áli oryndaı almaı keledi...
Aıta keter bolsaq, 2016 jyl – Alash kósemi Álıhan Bókeıhannyń 150 jyldyǵy IýNESKO kóleminde toılanýǵa tıis edi. Al, Qazaqstan bıligi úlken mereıtoı jasamady. Jekelegen zertteýshiler kitaptar shyǵardy. Eń eleýli degeni joǵaryda sóz bolǵan Qarǵandy qalasyndaǵy aýdan ataýynyń Álıhan Bókeıhan qurmetine ózgerýi edi. Ol sıyrquımyshaqtanǵan kúı keshti. Sózinde turlaý men turaǵy joq ákimdi kinálaımyz ba, Álıhan Bókeıhan degennen góri «Oktábr» degen ataýdy qasıet kóretin ákim sózine qarsy otandastarymyzdy kinálaımyz ba bile almadyq...
Gúlim JAQAN
