Oraldyq kásipker múgedekter eńbek etetin ujymǵa avtobýs tartý etti. Bul jóninde 24.kz jańalyqtary habarlaıdy.

Taǵdyr synyna ushyrap, eki aıaǵynan birdeı aıyrylǵan Birjan Qojaqov ózi basshylyq etetin jıhaz jasaý sehynda 17 kembaǵal jandy jumyspen qamtyp otyr. Olardyń qolynan shyqqan ulttyq naqyshtaǵy besik, sandyq pen ózge de jıhazdarǵa árkez suranys joǵary. Buǵan deıin kásipker sal aýrýyna shaldyqqan balalarǵa asa qajet bolatyn tirek-qımyl apparattaryn jasap, barlyq oblystarǵa tegin taratqan bolatyn. Jigeri muqalmaǵan qaısar jandar úshin erteńgilik jumysqa jetý men keshkisin qaıtý ońaı emes-ti. Bul týraly kásipker Birjan Qojaqov óziniń áleýmettik jelidegi paraqshasyna jazyp, kópshilikten kómek suraǵan bolatyn.

Qamqorlyqqa zárý jandarǵa qol sozǵan qaıyrymdy jannyń esimi – Talan Orazǵalıev. Jergilikti qus fabrıkasyna basshylyq etetin ol ujymǵa «PAZ» avtobýsyn tegin usyndy.

«Buǵan biz shyn kóńilden rızamyz ári qýanyshtymyz. Óıtkeni endi bul kólik tek bizdiń ujym múshelerin ǵana emes, qaladaǵy múgedek sportshylardy túrli jarystarǵa aparýǵa da kómegin tıgizedi. Bolashaqta jergilikti óndiris oryndarymen kelisip, avtobýsty múgedekterdiń minip-túsýine qolaıly etip jasaqtaýdy josparlap otyrmyn», - deıdi kásipker.