№58 mektep-gımnazıasynda sabaq beretin muǵalimniń bul áreketin bilim basqarmasy tekseredi, dep habarlaıdy Sputnik portaly

Jetinshi synyp oqýshysynyń anasy elordalyq №58 mektepte synyp jetekshiniń qyzyna qol júgirtkenin málimdedi. 

Áıel adam bul týraly qoǵam qaıratkeri Marat Qabylbaevqa aıtqan. Ol Facebook paraqshasynda jazǵan soń, bul oqıǵa kópshilikke aıan boldy. Bilim basqarmasy istiń anyq-qanyǵyna jetip, jarıaly túrde túsinikteme berýge ýáde berdi. 

Telefon arqyly suhbat bergen qyzdyń anasy 14 aqpan kúni qyzynyń mektepten jylap kelgendigin aıtty. Ol "muǵalim sabaq sońynan alyp qalyp, qolym men ıyǵymnan sıpady" dep aıtypty.  Oqýshynyń sózine súıensek, muǵalim "basqa qyzdarǵa da tıisedi", biraq olar muny aıtýǵa qorqady eken. 

Budan buryn synyp jetekshisi dene shynyqtyrý kezinde muǵalimge  baıqaýsyzda dop tıgizip alǵan er balany uryp jibergen.

Áıel adamnyń aıtýynsha, 18 aqpan kúni mektepte jınalys ótti, biraq dırektor da, mektep psıhology da qatyspapty. Esesine jınalysqa kelgen oqý isi meńgerýshisi men ózge muǵalimder áriptesterin maqtap, bolǵan oqıǵanyń túsinbeýshilik ekenin aıtqan.

"Men muǵalimmen sóılestim, jasy 22-de. Mektepke qarasha aıynda ornalasqan, ekinshi toqsanda. Basynda jylap, eshteńe aıta almady. Muǵalimder ony qorǵashtap edi, ózgerip sala berdi. Qyzymdy sıpaǵanyn moıyndap, muny oqýshylarymdy jaqsy kórgennen dedi. Basqa qyzdarǵa tıispegenin aıtyp, tipti er balany uryp jibergenin de joqqa shyǵardy. Ol jaıtty búkil synyp kórgen bolatyn. Meni jala japty dep aıyptaýǵa tyrysty", — deıdi áıel.

Osy oqıǵa áleýmettik jelilerde taralyp ketken soń, muǵalimniń ápkesi qyzdyń anasyna habarlasyp, baýyry úshin keshirim suraǵan. Keıin muǵalimniń ózi de qońyraý shalǵan eken.