Astanada QR Prezıdent ákimshiliginiń basshysy Ádilbek Jaqsybaev óziniń densaýlyǵyna baılanysty óz erkimen qyzmetinen ketedi degen sybys tarap júr. Sonymen qatar, Nursultan Nazarbaev úkimettiń jumysyna kóńili tolmaıtynyn jáne premer-mınıstrdi aýystyrý múmkin ekenin aıtyp júr dep jazady kz.expert.
Prezıdent kadrlyq ózgerister jasaýy múmkin be jáne ne úshin?
Onyń sebebi aıqyn. El men ekonomıka, ishki saıası turaqtylyq aýyr jaǵdaıda qaldy. Al mundaı jaǵdaıda Nazarbaev sheshimdi tez qabyldaıdy. Máselen, ótken ǵasyrdyń 90-shy jyldardyń basynda dástúrli jolmen daǵdarystan shyǵý jáne ekonomıkany kóterý óte qıyn boldy. Sol kezde elbasy jas jáne bolashaǵynan zor úmit kúttirttetin, memlekettik qyzmet mektebinen ótpegen Ákejan Qajygeldındi premer-mınıstr qyzmetine taǵaıyndady.
Al Qazaqstannyń Ulttyq bank tóraǵasy etip Dáýlet Sembaevty saılady. Ol buǵan deıin vıse-premer mınıstr bolǵan óte tájirıbeli ekonomıs. Qazaqstannyń qazirgi ekonomıkalyq jáne áleýmettik jaǵdaıy alǵashqy postkeńestik jyldarymen salystyrǵanda álde qaıda jaqsy. Desek te, ómir súrý deńgeıiniń birden túsip, kóterilýi qarsylyq áleýetin týdyryp otyr. Sonymen qatar, memlekettik apparat jáne memlekettik qurylym «quldyrap» bara jatyr. Olardyń jaǵdaıdy jaqsartýǵa degen talpynysy árqashan oń nátıje bere bermeıdi. Sondyqtan Nursultan Nazarbaev 20 jyl burynǵy sátti bolǵan tájirıbesin qaıtalaýy múmkin.
Búginginiń mańyzdy qyzmetteri - premer-mınıstr, Ulttyq bank tóraǵasy jáne memlekettik bılikti basqaratyn, onyń ishinde kadrlardy taǵaıyndaıtyndardyń ishinde tek Danıar Ákishov qana óz ornynda otyr dep aıtýǵa bolady. Al Ádilbek Jaqsybaev pen Baqytjan Saǵyntaevqa qatysty aıtar bolsaq, olardy halyqty artynan erte alatyn, táýekelge baryp, qıyn jaǵdaıda jeńiske jetedi dep aıta almaısyń. Bul degenimiz prezıdent óz seriktesterin talapqa jaýap beretin adamdarǵa aýystyrýǵa májbúr bolady degen sóz. Osyǵan oraı olardyń ornyn kim basýy múmkin jáne Nazarbaevta qandaı tańdaý bar ekenin boljap kórýge bolady.
Eń aldymen prezıdent ákimshiliginiń tóraǵasynan bastaıyq. Bul qyzmetke QR Parlament Májilis spıkeri Nurlan Nyǵmatýlın úmitker bola alady. Alaıda, bizdiń paıymdaýymyzsha Nurlan Zaırýllaulynyń oǵan múmkindigi az. Sebebi ol Aq Orda da óte qatal tártippen jumys istep basqarýshy elıtanyń kóbimen qarym-qatynasyn buzyp aldy. Ol prezıdent ákimshiligine qaıta kelgen jaǵdaıda da onyń oponentteri oǵan kedergi keltire bastaıdy. Ulttyq qaýipsizdik komıtetiniń basshysy Kárim Másimov týraly da osyny aıtýǵa bolady.
Basqa úmitkerlerdiń ishinen EKSPO-2017 kórmesi aıaqtalǵannan keıin jumyssyz qalatyn Ahmetjan Esimovti jáne kásipkerlikpen aınalysyp júrgen Bolat Ótemuratovty aıtýǵa bolady.
Alaıda Imanǵalı Tasmaǵanbetovtyń ózi saıasattyń bel ortasynda júrmeýdi qalaǵannan keıin Nursultan Nazarbaevtyń seriktesteri jaǵdaıdyń kúrdeliligin túsinip táýekelge barýǵa daıyn emes ekendigin ańǵarýǵa bolady.
Sondyqtan, prezıdent ákimshiliginiń jańa basshysy jáne premer-mınıstr endigi býynǵa beriledi dep aıtýǵa bolady. Olardyń ishinen eń birinshe oıǵa Astana ákimi Áset Isekeshov, Almaty ákimi Baýyrjan Báıbek, Qyzylorda oblysynan Qyrymbek Kósherbaev keledi. Olar jas, únemi halyqtyń aldynda júredi jáne bılikte oponentteri kóp emestigimen utady.
Alaıda naqty boljam aıta almaısyń. Sebebi elde joǵary laýazymdarǵa adamdardy tańdaý ashyq túrde júrgizilmeıdi. QR vıse-premer qyzmetin oıdaǵydaı atqara almaǵan Darıǵa Nazarbaevanyń memlekettik qyzmettke qaıtyp oralmaıtynyn ǵana anyq aıtýǵa bolady.
Qýandyq Bıshimbaev qamaýǵa alynǵannan keıin «bolashaqtyqtardyń» memlekettik apparattaǵy bedeli túsip qaldy. Qazir olar mınıstrdiń orynbasary jáne oblys ákimderi qyzmetine úmitker bola alady.
Nursultan Nazarbaev keremet úkimet jasaqtap, olar qazirgi máselelerdi sheship, eldi damý men kórkeıtýge baǵyttaıtyn jolǵa salýǵa tyrysatyn bolady.
Aýdarǵan: Ásem Álmuhanbet
