Aqtóbedegi qylmystyq ister jónindegi mamandandyrylǵan aýdanaralyq sotynda aǵaıyndardyń arasynda bolǵan janjalǵa qatysty sot tyńdalymy bastaldy. Bajasyn atyp óltirip, aıdalaǵa tastap ketken sottalýshy óz kinásin ishinara ǵana moıyndaıtynyn aıtty dep habarlaıdy «Qamshy» portaly óńirdegi NUR.KZ tilshisine siltep.
Oqıǵa 2016 jyldyń 3 qazanynda kúndizgi ýaqytta bolǵan. Hromtaý aýdany Kóktaý aýyly Nurly kósh kóshesiniń turǵyny Jetpis Rshımov telefon arqyly bajasyn mal bazasynyń mańyna kezdesýge shaqyrady. Ol ishimdik ishken kúıi kezdesýge kelgen bajasyn ańshy myltyǵymen atyp jiberip, oǵan eshqandaı kómek kórsetpesten aıdalaǵa tastap ketken.
Hablahat Janzaqov keýdesinen jaralanyp, ókpeden kóp qan ketýinen oqıǵa ornynda kóz jumady. Sotqa talap aryz túsirgen jábirlenýshiniń aǵasy sottalýshynyń osyǵan deıin de inisin uryp tastaǵanyn aıtty.
«Ekeýi de birin biri bala kezden tanıdy. Qarasý aýylynda týyp ósti. Keıin bir úıdiń qyzyn alyp baja boldy. Ol inimdi 1994 jyly da uryp, jaǵyn syndyrǵan bolatyn. Úıge eńbektep kelgen kúıeýin kórgen áıeli júkti edi. Bosanǵan kezde balasy sóıleı almaıtyn bolyp týdy.
Aǵaıynshylyqpen sotqa bergen joqpyz. Endi «qasharymdy joǵaltty» dep inimdi atyp óltirdi. Oqıǵa týraly inim ólgennen keıin ǵana estidim. Meni sol jerge aparǵanda qansyrap jatqan inimniń máıitin ǵana kórdim, polısıa júrdi. Ári qaraı esimde joq. Adam kórmese aıdaladan qus ta jep keter edi», - deıdi marqumnyń aǵasy.
Sottalýshy bajasyna oq atqanyn moıyndap, biraq ony qasaqana jasaǵan joqpyn dep aqtaldy.
«Aıypty ishinara moıyndaımyn. Atqanym ras, biraq qasaqana atqan joqpyn. Ólýine sebepshi bolǵan shyǵar... 1994 jylǵy oqıǵada men ony úıine baryp sabaǵan joqpyn. Onyń ózi úıime keldi», - dedi sottalýshy jaıbyraqat.
Aıyptaýda habarlanǵandaı, sottalýshynyń qarý ustaýǵa ruqsaty bolmaǵan.
Sottalýshy Jetpis Rshımov - 1961 jylǵy, buryn sottalǵan, úshinshi top múgedegi.
Ol sotta 6 balasy men nemereleriniń baryn aıtty. Búgingi sot májilisine oqıǵa týraly biletin eki kýáger kelgen joq.
Jábirlenýshiniń qorǵaýshysy sot tóraǵasyna aýylda kýágerlerdi qorqytý oqıǵasynyń bolǵanyn habarlady. Aıtýynsha, sotqa shaqyrylǵan káýgerler ózderin qorqytqandyǵy týraly polısıaǵa habar bergen.
Sot tóraǵasy Nurlan Sultanovtan jábirlenýshi tarap 10 mıllıon teńge moraldyq, 520 myń teńge materıaldyq shyǵyn ótep berýdi suraıdy.
Sotqa barlyq aǵaıyn-týǵan jınalǵan.
