Aqmola oblysynyń Kalachı eldi mekeninde "etıologıasy beımálim ensefalopatıa" belgileri taǵy úsh adam aýrýhanaǵa jatqyzyldy, - dep habarlaıdy Tengrinews.kz

64 jastaǵy áıel men 12 jáne 17 jastaǵy eki jasóspirim ótken sársenbi kúni Esil aýdandyq aýrýhanasyna jatqyzylǵan. 2 qyrkúıektegi málimet boıynsha, eldi mekende uıqyshyldyq atalyp ketken keselmen barlyǵy 15 adam aýrýhanaǵa túsken. Jalpy bul beımálim aýrýmen aýyrǵandardyń sany 60-tan acty.

Kalachıde turǵyndarynan uıqyshyldyq, umytshaqtyq jáne galúsınasıa belgileri ótken jyldyń naýryz aıynan beri anyqtala bastady. Olardyń bárine "etıologıasy beımálim ensefalopatıa" degen dıagnoz qoıyldy. Densaýlyq saqtaý mınıstrliginiń túrli komısıalarynyń, Radıasıalyq medısına jáne ekologıa ǵylymı-zertteý ınstıtýty, Qaraǵandy eńbek gıgıenasy jáne kásibı aýrýlar ǵylymı-zertteý ortalyǵy ǵalymdarynyń jáne basqa da mamandardyń kóp zertteý júrgizgenine qaramastan, aýyldaǵy beımálim aýrýdyń sebepteri áli anyqtalǵan joq.

 680 turǵyny bar Kalachı eldi mekeni Krasnogor aýyldyq okrýgine qaraıdy, ol burynǵy qala tıpindegi eldi meken - Krasnogorskiden 600 metr qashyqtyqta. Bul qalashyqta kezinde 6,5 myń adam turdy, olardyń basym kópshiligi - shahterler. Eldi meken KSRO-nyń rýda ónerkásibi basqarmasyna qarady, 60-90 jyldary aýyl mańynan ýran óndirildi. Ýran óndirisi 1991-1992 jyldary toqtap, shahtalar jabyldy.

Qamshy-aqparat