Áleýmettik jelide joǵarydaǵydaı sýret júr. Buny Qytaı úkimeti «Ulttar yntymaǵynyń asa qatty nyǵaıǵandyǵynyń» kórsetkishi etse kerek. Sýretten baıqaıtynymyz qazaqtyń órimdeı ul-qyzdary qytaıdyń óleýsiregen shal-kempirine «kúń» bolyp júr. Ústine «Qytaı Shyńjań eńbekshiler birlestigi» degen qyzyl lenta baılanǵan qazaqtyń bir kelinshegi qytaıdyń tyrnaǵyn alyp otyrsa, ekinshi bir kelinshek qytaıdyń shashyn ustaramen qyryp qyzmet kórsetip jatyr... Bizge jetken aqparat boıynsha, bundaı «qamqorlyq» qımylyna etnıkalyq ulttardan bir azamat aptasyna bir ret qatysýǵa mindettelgen.

Qytaıdaǵy qandastar bizge jıi joldaıtyn hattarda sońǵy on jylda Shyńjań aımaǵynda (Avtonomıalyq derbestigi bar aýdanda 1,5 mıllıonǵa jýyq etnıkalyq qazaq ómir súredi. –red.) asımılásıa qarqyndy júrip jatqandyǵy aıtylady. Qytaı úkimeti óziniń qytaılandyrý saıasatyn túrlishe «Ulttar yntymaǵy», «Baýyrlastyq» dep  búrkemeleıdi. Joǵarydaǵy sýret osyndaı búrkenshikti kóp saıasatynyń bir kórinisi ǵana.

Atap aıtqanda, Qytaıda qytaıdan basqa ulttar turatyn aýdandarda ár otbasyna birden ulty qytaı azamattardy óz otbasynda turǵyzýǵa mindettegen. Olar bir úıden tamaqtanyp, bir úıde uıyqtaıdy. 

Ár kúni tańerteń ár otbasynan bir adam ortalyq alańǵa baryp saǵat segiz shamasynda Qytaıdyń gımnin oryndaýǵa qatysýǵa tıis. Qatyspaǵandarǵa ákimshilik jaza qoldanady.

Ulty qytaı emes etnıkalyq ulttardan alynǵan áskerıler nemese polıseıler etnıkalyq aýdandardaǵy túrli jaǵdaılardy boldyrmaýǵa jumyldyrylady. Bir sózben aıtqanda ózin-ózine salǵan. Bundaı faktiler sanaı bersek jetkilikti...

Bárinen janǵa batatyny áneý qytaı tyrnaǵyn alǵan kelinshek úıindegi balasyn baǵý úshin lajysyz osyǵan kónip jatqan shyǵar. Anasyna osyndaı jumys istetken qytaı erteń balasyna ne istetedi?...

Sábına RAMAZAN