Ózbekstan Prezıdenti Shavkat Mırzıóev naýryzdyń 22-23 kúnderi Astanaǵa alǵash ret memlekettik saparmen keledi. Baýyrlas halyqtar úshin ulyq meıram sanalatyn Naýryz merekesi kúnderindegi sapardyń mańyzdylyǵyna sarapshylar nazar aýdara bastaǵan bolatyn. Osynaý memlekettik sapar qarsańynda Ózbekstan Respýblıkasynyń prezıdenti Shavkat Mırzıóev "QazAqparat" halyqaralyq aqparat agenttigi tilshisine eksklúzıvti suhbat bergen dep habarlaıdy Qamshy.kz.
Suhbatynda Ózbek prezıdenti óziniń Qazaqstanǵa alǵash ret kelip otyrǵanyna baılanysty «Qazaqstan Prezıdentimen bolatyn aldaǵy kezdesýde biz eń birinshi kezekte elder arasyndaǵy baılanysty belsendi ete túsý máseleleri boıynsha pikir almasyp, tutastaı óńirdegi jaǵdaıdy da talqylaıtyn bolamyz. Ózbekstan halqy baýyrlas Qazaqstannyń Prezıdenti retinde Nursultan Ábishuly Nazarbaevty biledi jáne qurmetteıdi. Byltyrǵy jyldyń qyrkúıek aıynda dosy Ózbekstan Respýblıkasynyń Tuńǵysh Prezıdenti Islam Abdýǵanıuly Kárimovty eske alý úshin N.Nazarbaevtyń bizdiń elimizge arnaıy kelýin halyq onyń tulǵalyq qasıeti retinde joǵary baǵalanǵan bolatyn. Mundaı dúnıeler esh ýaqytta umytylmaıdy... Qazaqstanǵa saparym bizdiń qarym-qatynasymyzdy damyta túsý úshin jańa qadamdarǵa jol ashady dep senemin. Eki eldiń de halqy dál osynaý kezdesýden kóp nárse kútip otyrǵanyn bilemiz. Ondaı senimderdiń aqtalatynyna da meniń úmitim mol», - degen.
2017 jyl Ózbekstanda Halyqpen dıalog jáne adam múddeleri jyly retinde jarıalanǵanyn aıtqan Mırzıóev «Bul negizinen bılik pen elimizdiń kez kelgen azamattary arasyndaǵy tikeleı baılanysty qalyptastyrýdyń ózektiligimen túsindiriledi. Bul rette byltyrǵy jyldyń sońyna taman halyq pen memleket arasyndaǵy ózara is árekettiń tıtimdi tetigi retinde vırtýaldy qabyldaý ashylyp, onda búgingi kúnge deıin jarty mıllıonnan astam adam pikir bildirgen. Osyndaı ótinishterdiń barlyǵy derlik qaralyp, belgili bir formada jaýaptar berildi.
Men halyqpen dıalogsyz eshqandaı da tabysty damýdy qamtamasyz etý múmkin bolmaıtyndyǵyna senimdimin. Al munyń túpki mánine kelsek, ol qarapaıym ǵana formýladan turady: halyq memleketke emes, memleket halyqqa qyzmet etýi kerek. Meniń oıymsha, Ózbekstanda búgin atqarylyp jatqannyń bári osy kvıntessensıada», - deıdi óz sózinde Ózbekstandaǵy demokratıalyq reforma týrasynda.
Tilshiniń qazirgi Ózbek-qazaq qarym-qatynasy týraly suraǵyna
«Ózbek-Qazaq qarym qatynasy shyndyǵynda da Ortalyq Azıanyń ornyqty damýynda úlken mańyzǵa ıe. Sol úshin de bizdiń memleketterimiz arasynda strategıalyq áriptestik týraly qujatqa qol qoıylýy kezdeısoqtyq dep aıta almaımyn. Ol qujat sózsiz barlyq baǵyttaǵy yntymaqtastyq máselelerimen tolyqqan. Biz basqalardaı emes, óz zamanymyzdyń eń kúrdeli kezeńderinde óńirdegi beıbitshilik pen turaqtylyqty saqtap qaldyq. Memleketter arasynda úlken ári salmaqty konflıktiler oryn alǵan joq. Bizdiń memleketter basshylarynyń, olardyń kóregendik saıasatynyń arqasynda kúni búginge deıin Ortalyq Azıanyń basqa da memleketterimen óńirdegi yntymaqtastyqqa kórinis beretin ózara tıimdi qarym qatynasty ornata aldyq. Men Ortalyq Azıany ıadrolyq qarýdan azat aımaq retinde jarıalap, bul bastamany álemdik arenada ilgeriletý, sonyń ishinde Birikken Ulttar Uıymynyń resmı qujaty retinde bekitý óńirlik mánge ıe bolyp qana qoımaǵanyn, onyń jahandyq deńgeıdegi ıadrolyq qarýdy taratpaý rejımin nyǵaıtýǵa kóp septigin tıgizgenine senimdimin.
Ortalyq Azıany damytý týraly aıta otyryp, biz kez kelgen kóliktik-kommýnıkasıalyq, energetıkalyq sıpattaǵy iri jobalardyń óńir memleketteriniń belsendi árekettesýinsiz, olardyń ıntegrasıasynyń joǵary deńgeıinsiz júzege asyrý múmkin emes ekenin jaqsy túsinemiz. Búgingi kúni Ortalyq Azıanyń halyqaralyq energetıkalyq jáne kóliktik jobalarda basty oıynshy bolyp kele jatqany - bul kóbinese osy óńirdegi memleketterdiń belsendi syrtqy saıasatyndaǵy qyzmetteriniń nátıjesine baılanysty. Birlesken jumystardyń arqasynda Ortalyq Azıa Batysty Shyǵyspen, Ońtústikti Soltústikpen baılanystyratyn halyqaralyq kólik dálizderiniń qıylysyna aınalyp otyr. Sonymen qatar, búgingi kúni Uly Jibek joly jańa bazada qalpyna kele bastady. Osyǵan baılanysty men Ortalyq Azıa memleketterin osydan birneshe ǵasyr burynǵy kezeńdegideı Eýrazıa qurlyǵyndaǵy basty kólik arterıasynyń júreginde turmyz dep aıtar edim.
Sonymen qatar Qazaqstan Ózbekstannyń mańyzdy ekonomıkalyq áriptesteriniń qataryna kiretinin úlken yjdaǵattylyqpen aıtyp ótkim keledi. Árıne, jahandyq qarjy daǵdarysy elder arasyndaǵy taýar aınalymynyń qarqynyna áser etpeı qoımady. Áıtse de bizdiń elderimizdiń yntymaqtastyǵynda iske aspaǵan áleýetterdiń basym bóligi osy salada ekenin moıyndaýǵa týra keledi. Ózbekstanda qazaqstandyq kapıtaldyń qatysýymen jumys istep jatqan 230 kásiporyn bar. Al Qazaqstanda bizdiń elimizdiń rezıdentteriniń qatysýymen 130-ge tarta kásiporyn jumys isteýde. Bul kórsetkishti eseleı túsýge de bolatyn edi. Taýar aınalymyn da birneshe esege arttyrýǵa múddelimiz», - dep jaýap bergen ózbek basshysy.
Suhbat sońynda ózbek eli basshysy «Osy jolǵy Qazaqstanǵa saparymnyń Naýryz meıramymen tuspa tus kelýiniń tereń sımvoldyq máni bar. Naýryz - bizdiń erteden kele jatqan ortaq, ulyq merekemiz, ol Jańa jyldyń kelgenin, jańǵyrý men jańa ómirdiń bastalǵanyn bildiredi. Bul kúnderi Qazaqstan Konstıtýsıaǵa ózgerister engizip, mańyzdy sheshim qabyldap jatsa, Ózbekstan da bes basym baǵyt boıynsha is-qımyl Strategıasyn júzege asyra bastady. Endeshe bizdiń elderimiz de jańǵyrý men jańa damý tabaldyryǵynda tur. Biz shyn kóńilden Qazaqstannyń odan ári gúldenýin tileımiz. Ózbek eliniń úlken dosy, qurmetti Nursultan Ábishuly Nazarbaevtyń dana basshylyǵyndaǵy Qazaq eli «Qazaqstan-2050» Strategıasyndaǵy kózdegen mindetterge qol jetkizip, álemniń damyǵan elderiniń qatarynan kórinetinine senimdimin. Bundaı uly maqsattarǵa qol jetkiziletininen esh kúmán joq, sondyqtan Qazaqstan halqy da damýdyń jańa deńgeıine kóteriledi degen senimdemin. Naýryz meıramynda árbir qazaqstandyq otbasyǵa ıgilik, baqyt, beıbitshilik pen gúldenýdi tileımin», - dep tilegin joldaǵan qazaqstandyqtarǵa.
