Deshti Qypshaq dalasyn ýysynda ustap, 40 jyl Túrkistan alqabyn bılegen Ábilqaıyr hannan keıin Túrkistan dalasynda Shaıbanı ulysy men Qazaq handyǵy qalyptasty. Shaıbanı ulysy keıinnen Ózbek hannyń atymen ózbek handyǵy atalyp, búgingi Ózbekstan memleketiniń ataýyna aınaldy. Al, Qazaq handyǵynan búgingi qazaq eli – Qazaqstan tarıh sahnasynan óz ornyn aldy. XX ǵasyrdyń basynda patshalyq Reseıden óz táýelsizdigin alýǵa umtylǵan Alash Orda terıtorıasynyń quramynda búgingi Ózbekstannyń biraz aýmaǵy bar bolatyn. Eki el de 70 jyldaı ýaqyt Sovet úkimeti otarynda avtonomıaly respýblıka bolyp ómir keshti.
Táýelsizdik alǵannan keıingi Qazaqstan men Ózbekstannyń alǵashqy qujat qoıyp, qol alysa kelisim jasaýy 1992 jyldyń 24 maýsymynda oryn alǵan eken.
Qazaqstan Prezıdenti Nursultan Nazarbaevtyń 1994 jyly Tashkentke sapary barysynda qol qoıylǵan Birtutas ekonomıkalyq keńistikti qurý týraly shart Qazaqstan men Ózbekstan arasyndaǵy baılanysty jan-jaqty, ásirese, ekonomıkalyq yntymaqtastyqty odan ári tereńdetýge septigin tıgizdi. 1997 jyly naýryzda jasalǵan Qazaqstan, Ózbekstan men Qyrǵyzstan Respýblıkalarynyń arasyndaǵy Máńgilik dostastyq týraly úshjaqty shart - qarym-qatynasty damytýdaǵy taǵy bir mańyzdy qadam boldy.
Prezıdent Nursultan Nazarbaevtyń 1998 jyldyń qazanynda Ózbekstanǵa jasaǵan resmı sapary kórshiles elderdiń yntymaqtastyǵyn arttyrýǵa tyń serpin berdi.
Ózbekstan - Qazaqstannyń negizgi áriptesteriniń biri. Táýelsiz damý jyldarynda Ózbekstanda munaı-gaz salasy, sondaı-aq toqyma, aýyl sharýashylyǵy, qurylys jáne týrısik salalar qarqyndy damydy. Avtomobıl ónerkásibinde eleýli jetistikterge qol jetkizgen Ózbekstan TMD aıasynda jeńil avtomobılderdi iri eksporttaýshy, sondaı-aq kólik komýnıkasıalary men logıstıkada aıtarlyqtaı tabystarǵa qol jetkizdi. 2008 jyly Ózbekstan prezıdentiniń Astanaǵa saparynan keıin eki eldiń saýda qarym-qatynastary qarqyndy damı tústi. Syrtqy saýda aınalymy 2005 jyldan 2013 jylǵa deıin 4 esege artyp, 2 mıllıard dollardan asty. 2015 jyly saýda aınalymy 3,2 mlrd. dollarǵa deıin jetti.
Al 2013 jyldyń 13-14 maýsymynda Qazaqstan Prezıdenti Nursultan Nazarbaevtyń Ózbekstanǵa resmı sapary barysynda taraptar saıası, saýda-ekonomıkalyq jáne mádenı-gýmanıtarlyq yntymaqtastyq máselelerin talqylady.
2014 jyly Ózbekstan Prezıdenti Islam Kárimovtiń Qazaqstanǵa resmı sapary barysynda da birqatar ekijaqty qujattarǵa - 1997 jyldyń 2 maýsymyndaǵy Ónerkásiptik menshikterdi qorǵaý salasyndaǵy yntymaqtastyq týraly úkimetaralyq kelisimge ózgerister engizý týraly hattama jáne 2015-2016 jyldarǵa arnalǵan yntymaqtastyq baǵdarlamasyna qol qoıyldy. Sonymen qatar, ártúrli deńgeıdegi kezdesýlerde de taraptar saýda-ekonomıka, sý-energetıka, kólik-logıstıka jáne mádenı-gýmanıtarlyq salalardaǵy ekijaqty yntymaqtastyqtyń negizgi baǵyttaryn talqylap keledi. Eki eldi biriktiretin ortaq tarıhı-mádenı muralar, qundylyqtar da barshylyq. Qazaq halqynyń áıgili bıleri Tóle bı men Áıteke bıdiń etnomemorıaldyq keshenderi Ózbekstan aýmaǵynda. 2013 jyly Tashkentte Abaı eskertkishi ashyldy.
Alys saparǵa týysyn shyǵaryp turyp ózbekter: «Dosyń qazaq bolsyn» dep bata beredi eken. Bul qazaq halqynyń adaldyǵyn, dosyn jaýǵa bermeıtin jaýgerligin, qonaǵyna degen keń peıildigin ańǵartsa kerek. Túbi bir túrki jurtynda ózbekti qazaq «óz-aǵam» dep syılaıdy.
Táýelsizdikten beri ózbek bıligin tizgindep otyrǵan Prezıdent Islam Kárimov byltyr 78 jasynda ómirden ozǵannan soń, onyń ornyna Shavkat Mırzıóev saılanǵan. Naýryz merekesi qazaq pen ózbek halqy úshin de ulyq. Ózbekstanda da naýryz merekesi toılanyp, úsh kún demalady.
Sarapshylar Ózbekstan Prezıdenti Shavkat Mırzıóev óz laýazymyna kiriskennen beri eki jaqty qarym-qatynastyń belsendi damı bastaǵanyn alǵa tartady. Byltyrǵy jyldyń sońy men 2017 jyldyń aıaǵynda túrli deńgeıde kelissózder júrip, sheshilýi tıis birshama másele saraptalǵan.
