Búgin Ál-Farabı atyndaǵy Qazaq Ulttyq Ýnıversıtetiniń rektory Ǵalymqaıyr Mutanuly Mutanovtyń 60 jasqa tolǵan týǵan kúni. «Qamshy» portaly Ǵalymqaıyr Mutanov myrzany búgingi mereıtoıymen quttyqtaı otyryp, qyzmetine tabys tileıdi!
Ǵalymqaıyr Mutanuly Mutanov 1957 jyly 3 naýryzda Shyǵys Qazaqstan oblysy, Jarma aýdany, Belterek aýylynda dúnıege kelgen. QR Ulttyq akademıasynyń qurmetti múshesi Ǵalymqaıyr Mutanov Qazaq polıtehnıkalyq ınstıtýtyn “Avtomatıka jáne telemehanıka” mamandaǵy boıynsha támamdap, Máskeý taý-ken ınstıtýtynyń aspırantýrasyn bitirgen.
Óziniń eńbek jolyn Rýdnyı ınstıtýtynda oqytýshylyq qyzmetten bastaǵan.
Máskeý bolat jáne qorytpalar ınstıtýtynyń «Tústi jáne sırek metaldardyń tehnologıalyq úderisterin avtomattandyrý» kafedrasynda eki jyldyq ǵylymı synaq merziminen ótken. Onyń kandıdattyq jáne doktorlyq dısertasıalary jasandy aqyl-parasat elementterin qoldanyp, tehnologıalyq úderisterdi avtomattandyryp basqarý teorıasy men praktıkasyna arnalǵan.
Ol 1995-2002 jyldary SQMÝ-dyń rektory qyzmetin atqardy.
2002 jyly Ǵalymqaıyr Mutanov QR-nyń Birinshi bilim jáne ǵylym vıse-mınıstri laýazymynda jumys atqardy. Onyń basshylyǵymen Bilim men ǵylymdy damytý tujyrymdamasynyń negizi qalanyp, ony eń basym baǵyttarda iske asyrý boıynsha jaqsy nátıjeler kórsetti.
Keıinnen 2003 jyly shilde aıynda – D.Serikbaev atyndaǵy Shyǵys Qazaqstan memlekettik tehnıkalyq ýnıversıtetiniń rektory bolyp taǵaıyndalyp, ınovasıa, bilim sapasy, álemdik bilim keńistigimen birigý baǵytyn ustandy.
2010 jylǵy 7 qazannan bastap, osy ýaqytqa deıin – ál-Farabı atyndaǵy Qazaq Ulttyq ýnıversıtetiniń rektory.
Ǵalymqaıyr Mutanuly ómirin tek ǵylymǵa arnamaı, óleń men sportty da qatar alyp júrgen jan. KSRO-nyń dzúdo kúresi boıynsha sport sheberi. Ol QR-nyń eńbek sińirgen sport qaıratkeri, Shyǵys jekpe-jek kúresi qaýymdastyǵynyń vıse-prezıdenti. Jyrlary Respýblıkalyq "Qazaq ádebıeti" gazetinde jaryq kórgen.
Ǵ.Mutanov 10 halyqaralyq akademıalardyń akademıgi bolyp tabylady, ol áleýmettik-ekonomıkalyq úderister aıasyndaǵy taqyryptarǵa jazylǵan 400-den artyq ǵylymı jarıalanymnyń, sonyń ishinde 10 monografıanyń, oqýlyqtardyń, oqý quraldarynyń, ádistemelik ázirlemelerdiń avtory. Bular AQSH, Chehıa, Shvesıa, Germanıa men Shveısarıada basyp shyǵarylǵan; sondaı-aq 35-ten astam patenttiń, óner tabystardyń avtory. Ol jasandy aqyl-parasatty, saraptama júıelerin qoldaný negizinde tehnıkalyq jáne áleýmettik-ekonomıkalyq salalardaǵy matematıkalyq úlgileý jáne basqarý jónindegi ǵylymı mektebin qurdy. Ol úsh ǵylym doktoryn jáne otyzǵa jýyq ǵylym kandıdatyn daıyndady. IGIP Halyqaralyq ınjenerlik pedagogıka qoǵamy Ortalyq Azıa bólimshesiniń Prezıdenti jáne monıtorıń komıtetiniń múshesi (Shveısarıa), Halyqaralyq ınjenerlik bilim federasıasyndaǵy (IFEES) Qazaqstandyq qoǵamnyń (KazSEE) Prezıdenti, UNESCO bilim berýdegi aqparattyq tehnologıalar ınstıtýtynyń Basqarýshylar Keńesiniń múshesi (Parıj), ol «Tehnıkalyq joǵary oqý ornynyń eýropalyq oqytýshysy» ataǵynyń, Respýblıka ǵylymyn damytýǵa eleýli úles qosqan jáne de Qazaqstan úshin basym baǵyttar boıynsha ǵylymı zertteýlerdi belsene júrgizetin áıgili ǵalymdarǵa arnalǵan QR UǴA grantynyń ıegeri bolyp tabylady.
Ǵ. Mutanov Halyqaralyq bıblıografıalyq ortalyqtyń kúmis medalimen (Kembrıdj), "The United Europe" Altyn medalimen (Oksford) marapattalǵan.
Ol Qazaqstan Respýblıkasynyń eńbek sińirgen ǵylym jáne tehnıka qaıratkeri, “Parasat” ordenimen, «Qazaqstan Respýblıkasynyń táýelsizdigine 10 jyl», «Qazaqstan Parlamentine 10 jyl» merekelik medaldarymen, «QR Prezıdentiniń erekshe belgisi», «Qazaqstan Respýblıkasynyń halyqqa bilim berý úzdigi», «Qazaqstan Respýblıkasynyń qurmetti bilim berý qyzmetkeri», «Qazaqstan Respýblıkasynyń Qurmetti ınjeneri» tósbelgilerimen marapattalǵan.
Ǵ.M. Mutanov «Injınırıń jáne tehnologıalar transferti ortalyǵy» AQ Dırektorlar keńesiniń tóraǵasy, «Ulttyq ınovasıalyq qor» AQ qoǵamdyq konsýltasıalyq keńesiniń tóraǵasy.
