Aıdyń ortasynda «Qamshy» portaly Toqtar Serikovtyń «Syrlasý» baǵdarlamasyna bergen suhbatynda qytaıǵa shyqqan qazaq qyzdaryn «jezókshe» dep ataǵany jaıynda jarıalaǵan bolatyn. Onyń pikirin qazaq jigitteri túgeldeı qoldap, durys aıtqan desip jatsa, keı qyzdardyń namysyna tıip ketken kórinedi. Portalymyzǵa 35 jastaǵy Aısulý Berkinbaı atty almatylyq arýdan ánshiniń aıtqandaryna renishin bildirip, jaýap jazǵan hat keldi. Bul hatqa Toqtar Serikovtyń ózi jaýap bere me eken? Hattyń mazmuny tómendegideı:
«Qurmetti Toqtar Serikov, sizdi ánshi retinde erekshe qadirleıtin edim. Ánderińizdi tyńdap óstim, elimizdegi betke ustar azamattardyń biregeıi dep sanadym. Jaryńyz Beıbit Seıdýalıeva ekeýińizdiń ómirińizge qyzyǵa qarap, otbasylyq qundylyqtardy baǵalaı biletin januıa dep úlgi tuttym. Biraq, túsingenim, adamdy syrtqy kelbetine qarap qana baǵalaýǵa bolmaıdy eken. Iá, ónerińizge, talantyńyzǵa ǵashyq boldym. Sahnaǵa shyqqan osy eken dep, aýyzdaryn jybyrlatyp áıteýir birnárse aıtatyn ánshi symaqtardyń janynda talantty daryn ıesi dep baǵalap júrgen sizdiń ishki jan-dúnıeńiz ben peıil-nıetińiz istegen áreketińizge múldem saı kelmeıdi eken.
Jaqynda «Syrlasý» baǵdarlamasynda qytaı jigitterine tıgen qazaq qyzdary jaıynda óz pikirińizdi aıtyp qalypsyz. Buny barlyq aqparttyq saıttar jarysa jazdy. Aıtqandaryńyzdy meniń de kózim shaldy. «Qytaıǵa tıetinder kimder? Jezókshe qyzdar tıedi, ábden bolǵan, ar-namysy, tegi joq, qany joq, qazaqqa túri ǵana uqsaıtyn bireýler tıýi múmkin. Olar tıse tıe bersin, qaıǵyrmaımyn. Al naǵyz meniń qaryndastarymnyń tıýi múmkin emes» degen ekensiz.
Toqtar myrza, sizge túri ǵana emes, qany da, jany da, tegi de qazaq, biraq qytaı azamatyna turmysqa shyqqaly jatqan almatylyq qyz retinde hatymdy joldamaqpyn. Jasym bıyl 35-ke keledi. Osy ýaqytqa deıin nege jalǵyz júr dep sógersizder. Joq, qazaq jigitterin mensinbegenim nemese mansap qýǵanym emes, qartaıyp qalǵan ata-anama qaraılastym. Qazaqstandaǵy shet eldik kompanıada jumys istep, bar jaǵdaılaryn jasadym. Men olardyń jalǵyz qyzdary edim. Turmys qur, ana atan dep ata-anam talaı jyldan beri qaqsap keldi. Alaıda, ol kisilerdiń qý tizelerin qushaqtatyp qoıyp, basqa shańyraqtyń otyn tutatyp otyrýǵa dátim barmady. Ne degenmen, mańdaıyma qyz bolyp dúnıege kelý jazylǵan soń, kónbeske amalym joq. Turmys quryp, ana ataný ár áıel zatynyń mindeti ǵoı.
Al, endi oılap kórińizshi, jasy 40-qa taıap qalǵan, kózinde jastyq janary taýsylǵan adamdy áıeldikke qaı qazaq alsyn. Máselen, ózińiz áıelim joq dep elestetińizshi? Jaǵdaıymdy túsinip, bilseńiz, siz meni alar ma edińiz, Toqtar aǵa? Elimizde toqal alý máselesi zańdyq turǵydan qabyldanyp, mindettelgenniń ózinde jańadan úılengen er-azamattar bylaı tursyn, tipti, shal-shaýqan úrimdeı jas qyzdardy alýǵa tyrysatyn edi ǵoı.
Onyń ústine qazaqta qalyptasqan túsinik bar: 25-ten asyp, turmysqa shyqpaǵan qyz otyryp qalǵan bolyp sanalady. Ondaılar ózine laıyq jigitterdi tańdaımyz dep, eshbirin jaqtyrmaı, túbi jalǵyz qaldy deısizder. Ásirese, bundaı túsinik qazaq jigitteriniń oıyn jaýlaǵan. Al, shet elde múldem basqa mentalıtet. Olar úshin ómirde eshteńe de kesh emes. Qyz-jigitter úılenip-turmys qurýǵa da asyqpaıdy. Jasy kelse de, jalǵyz júrgen qyzdarǵa er-azamattar úreılene qaramaıdy. Men de ózimdi túsinetin jigitti izdedim, maǵan aıanyshty halmen emes, shyn súıip, kóńilimdi jubata alatyn naǵyz azamatpen birge bolǵym keldi. Sóıtip, Qazaqstanda jumys istep jatqan qytaı azamatyn jolyqtyrdym. Ol maǵan barlyq jaǵynan qoldaý kórsetip, kómektesip júredi. Tipti, ata-anam úshin de qolynan kelegenin istep baǵyp júr.
Qaıtalaımyn, meniń qytaı azamatymen bas qosýyma sebep jezókshelik nemese namysymnyń joqtyǵy emes, ózimdi túsinip, shyn súıetin azamattyń bolǵany. Ár sózińizge abaı bolsańyz eken, Toqtar myrza! Adamnyń jan-dúnıesine úńilmeı, syrttaı ǵaıbattaýyńyz naǵyz azamatqa tán qylyq emes. Eger qytaılyq jigitterge shyn mánisinde aqsha úshin nemese basqa da aram-pıǵylmen turmysqa shyqpaq bolǵan qyzdardy kórseńiz, ózine jeke aıtyńyz. Bundaı sózderińizben halyqqa jaqtym dep oılasańyz, qatelesesiz!»
