Ótken jyly Qaraǵandy oblysynda oryn alǵan jantúrshigerlik qylmystyń jaı-japsary anyqtaldy, dep habarlaıdy qasym.kz.

 Azamattyq nekedegi erli-zaıyptylardyń eki jastaǵy qyzdary joǵalyp ketken. Jedel izdestirý sharalary barysynda polıseıler qyz balany onyń ógeı ákesi órtep jibergenin anyqtady. Anasy oǵan esh qarsylyq kórsetpegen. Qaıta qylmystyń izin jasyrýǵa járdemdesken. 

Aqpan aıyndaǵy úskirik aıazdardyń birinde erli-zaıyptylar Qaraǵandy oblysyna qarasty Shet aýdany Aǵadyr aýylyndaǵy qystaýdan qalaǵa qaıtady. Olarmen birge ortaq nekelerinen týǵan er bala men áıeldiń birinshi nekesinen týǵan qyz bala bolǵan. Otbasy músheleri qalada turaqty baspanalary bolmaǵandyqtan qala mańyndaǵy saıajaılardyń birine baryp qonystanýdy sheshedi. 
Saıajaıǵa jaıaýlatyp shyqqan otbasy músheleri orta jolǵa kelgen kezde er azamat sharshaǵanyn syltaýratyp, balany kóterip júrýden bas tartady. Erli-zaıyptylardyń arasynda kishigirim janjal týyndaıdy. Osy kezde kishkentaı qyz jylaı bastaǵan. Buǵan ashýlanǵan erkek onyń ústine eki aıaǵymen sekiredi. Jaraqat saldarynan sábı oqıǵa ornynda kóz jumady. Al otbasy músheleri máıitti dalaǵa tastap, saparlaryn jalǵastyra beredi. Tek kelesi kúni ǵana óziniń qandaı qylmysqa barǵanyn túsingen er azamat qylmystyń izin jasyrý maqsatynda máıitti órtep jiberý týraly sheshim qabyldaıdy. Munyń bári áıel adamnyń kóz aldynda bolǵan. Alaıda ol qandaı da bir qarsylyq kórsetpeı, bárin únsiz qabyldaıdy. 
Kúdiktiler QR Qylmystyq Kodekstiń 99-baby, ıaǵnı «kámelettik jasqa tolmaǵan adamdy óltirý» babymen qamaýǵa alynǵan. Qazir tergeý amaldary jalǵasýda. Atalmysh is boıynsha sot otyrysy aǵymdaǵy jyldyń sáýir aıyna belgilengen.