Eger ǵajaıypqa senetin bolsańyz, ol mindetti túrde oryndalady. Tipti, eń úlken syıdyń ózin qoqys jáshiginen tabýǵa bolady eken. Buǵan tómendegi oqıǵa dálel.

Oqıǵa osydan 8 jyl buryn Qytaıda oryn alǵan. Sún esimdi qaıyrshy ózine jeıtin azyq tabý úshin ár kúni kóshelerdegi qoqys jáshigin aqtarýmen ótedi. Sondaı bir kúnde Sún qoqys jáshiginiń ishinen balanyń jylaǵan daýysyn estıdi. Úńilip qarasa, kórpege oranǵan sábı jatyr eken. Kórpesinde «2007 jyly 15 qazanda dúnıege kelgen» degen jazýy bar qaǵaz tabyldy. Sún bir amalyn qarastyrmasa, sábıdiń ólip ketýi múmkin ekenin túsindi. Sóıtip, ózi kómektesýge bel baılaıdy.

Sol kúnnen bastap eki adamnyń ómiri túbegeıli ózgeredi.

Alǵashynda er adam sábıdi balalar úıine aparmaq bolady. Alaıda, eshbirinde oryn bolmaı, basshylary qabyldaýdan bas tartqan. Bul da bir taǵdyrdyń bergen syıy shyǵar dep Sún sábıdi ózi turyp jatqan kishkentaı ǵana úıine alyp ketedi.

Súnnyń áıeli de bolǵan. Biraq, bundaı joqshylyqqa shydaı almaǵan ol úıinen ketip qalady, biraz ýaqyttan soń zańsyz jerde ornalasqan úılerin de buzyp tastaıdy. Sábımen dalada qalǵan Sún qaıtse de qyz balany ósip-jetildiremin dep oılaıdy. Oǵan Ianán degen esim qoıady. Óziniń ishýin doǵarady. Jaman áreketterinen arylady. Naǵyz áke bolýǵa tyrysady. 

Sún men sábı Nanchan qalasynyń ortalyq kópirin panalap, kún keshedi. Balany óz qyzyndaı qabyldaǵan er adam ózi ash qalsa da, qyzyn eshteńeden taryqtyrǵan emes. «Qanshalyqty qıyn bolsa da, men qyzymdy ózi er jetip, óz kúshimen aqsha taba alatyndaı jaǵdaıǵa jetpeıinshe tastap ketpeımin» dep júretin adamdarǵa.

Sondaı-aq, Ianánnyń qylyqtary da tátti bolǵan eken. Ol oqyǵandy jaqsy kórgen, óleń oqyp, án aıtyp kópir astyndaǵy ózderi sekildi adamdardy árdaıym kóńildendirip otyratyn. Alaıda, Sún qyzynyń jasy 8-ge keldi, biraq áli mektepke barmaı júrgenine alańdaýly. Ekeýiniń de tirkeý qujattary bolmaǵandyqtan, qyz eshqandaı mektepte bilim ala almaıtyn kórinedi. Sol sebepti, Sún men basqa da úısizder qyzǵa ózderi oqyp-jazýdy, tipti arıfmetıkanyń negizin úıretedi.

Dalada óskenine qaramastan qyzdyń densaýlyǵynda eshqandaı aqaý joq. Sún da balasynan óziniń bar jylýlyǵyn aıamaǵan. Ony ómirinen de artyq jaqsy kóredi eken. Ózi túksiz qalsa da, qyzyn qalaı da adam qylatynyna úısiz er adam senedi. Bul oqıǵany oqyǵan Feısbýk qoldanýshylar ózderiniń kómekterin aıamaıtynyn jarysa jazyp jatyr. Nátıjesi oń bolar dep senemiz.