Iá, Amerıkada aman-esen jaqsy jaǵdaıda bosanyp alýdy qaı áıel armandamaıdy? Óz balalaryn tek AQSH-tyń dárigerlerine ǵana tabystaǵysy keletin áıelder qatarynda juldyzdar, tanymal tulǵalar bar.

Alaıda, balany Amerıkada bosaný tek tájirıbeli mamandardyń kómegine muqtajdyqtan, solarǵa degen senimniń kúshti bolýynan emes, jalpy alǵanda Amerıka azamattyǵyn ala otyryp, balanyń bolashaǵyna belgili-bir turǵyda negiz jasaý  bolyp tabylsa kerek.

Alıa Arkesheva esimdi azamatshanyń AQSH-qa baryp bosanyp kelýiniń basty maqsaty- deni saý balany dúnıege ákelý bolǵan. Onyń sózine qaraǵanda, Shon Leonard esimdi uly avtomatty túrde AQSH-tyń azamattyǵyn alǵan. Dál osy jaǵdaı eki jyldan beri osyndaı sheshim qabyldaǵan anany mezi etken problemaǵa aınalǵan. Bul týraly «Qamshy» portaly   informburo.kz-ke silteme jasap habarlaıdy.

«Memleket meniń kámeletke tolmaǵan balama QR-nyń azamattyǵyn berýden bas tartyp otyr. Balamnyń AQSH azamattyǵyn alýynyń sebebi, meniń ony 2015 jyly sáýirde AQSH terıtorıasynda bosanǵanym. Meniń osyny dáleldeıtin naqty anyqtamalarym bar» deıdi ol.

Balasyna Qazaqstan azamattyǵyn alyp bere almaı júrgen Alıa  Astanaǵa osy máseleni sheshý úshin kelgen. 16 naýryzda Úkimet úıiniń aldynda jalǵyz narazylyqqa shyqqan.

Áıeldiń, sózine qaraǵanda, Vashıngtondaǵy qazaqstandyq elshilik qyzmetkerleri oǵan azamattyqty qaıta ózgertý 2-3 aıdy ǵana alatynyn aıtyp sendirgen. Alaıda, elge oralǵan áıel máseleniń ońaı emestigin ańǵarǵan.

Reseıde 1-den kóp azamattyq ala berýge ruqsat bar. Kámeletke tolǵan kezde bala óziniń qaı eldiń azamattyǵyn alatynyn óz erkimen tańdaı alady. Al Qazaqstanda, eki birdeı azamattyq alýǵa tyıym salynady.

Balanyń Qazaqstan azamttyǵyn alý úshin resmı túrde AQSH azamattyǵyn joıýdan bas tartyp aryz jazýy kerek ekenin Syrtqy ister mınıstrligi túsindirgen.

Amerıka azamttyǵynan bas tartýǵa áıel qarsy emes. Alaıda barlyq másele osynda jatyr. Osy suraq boıynsha Qazaqstandaǵy AQSH elshiligine barǵan áıel mynany biledi: bala azamattyǵyn óz erkimen ǵana joıa alady. Iaǵnı, bala tek 18 jasqa kelgen kezde ǵana resmı túrde AQSH azamattyǵynan aıyrylyp, Qazaqstan azamattyǵyn alý kerek bolady. Oǵan deıin bul másele sheshimin taba almaıdy.

AQSH-tyń Qazaqstandaǵy elshiliginiń ókili Ren Elhaı bylaı deıdi:

«AQSH terıtorıasynda dúnıege kelgen kez-kelgen bala osy eldiń azamattyǵyna ıe bolady. Balanyń ata-anasy nemese qamqorshylary  bala azamttyǵynan bas tarta almaıdy».

Alıa Arkesheva men onyń uly Shon Leonard qıyn jaǵdaıǵa tap bolyp otyr.

Bala Qazaqstan azamattyǵyn alý úshin aldymen AQSH azamattyǵynan aıyrylýy kerek. Al AQSH azamattyǵynan aıyrylý úshin ol kámeletke tolyp, ol sheshimdi ózi qabyldaýy kerek.

Demek, Alıanyń balasy tek 16 jyldan keıin ǵana óz erkimen AQSH azamattyǵyn joıyp, Qazaqstan azamattyǵyn ala alady. Ol ýaqytqa deıin memleket basqa eldiń azamatyna qamqorlyq jasaýǵa tyıym salady. Bul máseleni sheshe alatyn tek QR-nyń prezıdenti bolyp otyr.

Sheteldik azamat retinde Shon Leonardqa Qazaqstanda orta bilim alýǵa, densaýlyq saqtaý men quqyqtar men bostandyqtary jaǵynan Qazaqstan azamattarymen birdeı dárejede qaraý kerek.

Alaıda, Alıanyń sózine qaraǵanda, onyń balasy mundaı quqyqtar men bostandyqtardyń eshqaısysyna ıe emes.

«2016 jyldyń naýryzynda meniń balamdy emdeýden bas tartty. Emhanaǵa tizimge de turǵyza almaı júrmin. Memlekettik balabaqshaǵa da berý úlken problemǵa aınaldy» deıdi áıel.

Al, Syrtqy ister mınıstrliginde Alıa Arkesheva men onyń balasyna qatysty máselege pikir bildirilgen joq.