Búgin, 14 sáýirde Reseı Syrtqy ister mınıstrligi Máskeý memlekettik halyqaraalyq qatynastar ınstıtýtynda «Kaspıı dıalogy-2017» ekonomıkalyq forýmy ótti.
Forýmnyń ashylýynda Qazaqstan Respýblıkasynyń Reseı Federasıasyndaǵy Tótenshe jáne Ókiletti Elshisi Imanǵalı Tasmaǵambetov sóz sóılep, Forýmdy ótkizýdiń on jyldyq tarıhy bul tek álemdik nemese aımaqtyq geosaıası jáne áskerı-saıası múddelerdiń ushtasýy ǵana emes, sonymen qatar Shyǵys pen Batysty jalǵaıtyn Uly Jibek joly qurlyqaralyq baǵyttar túıisetin mańyzdy hab ekendigin atap ótti. Munda ǵalamnyń aýqymdy tabıǵı jáne bıologıalyq baılyǵy jınaqtalǵan.
"Bizdiń ortaq maqsatymyz – Kaspıı teńiziniń baı resýrstyq áleýetin tıimdi ıgerý, onyń erekshe ekojúıesin damytý jáne bolashaq urpaq úshin saqtaýdy qamtamasyz etý", – dep atap ótti Elshi.
"Kaspıı teńiziniń quqyqtyq mártebesi jónindegi Konvensıanyń negizinde tutas quqyqtyq-kelisimder bazasyn qurý mańyzdy másele retinde saqtalyp otyr", – dedi Imanǵalı Tasmaǵambetov.
Óz kezeginde, RF Prezıdentiniń Reseı men TMD elderi arasyndaǵy shekarany delımıtasıalaý men demarkasıalaý suraqtary boıynsha teń tóraǵasy, RF SİM arnaıy tapsyrmalary boıynsha elshisi Igor Brachıkov, Kaspıı teńiziniń quqyqtyq dárejesin aıǵaqtaıtyn Konvensıa bitýge jaqyn ekenin málim etti.
Sondaı-aq ol, 2014 jyly Astrahanda ótken 4-shi Kaspıı samıtinde kaspıı elderiniń basshylary aıtarlyqtaı bir mámilege kelgendigin jáne sonyń arqasynda Kaspıı teńizi Konvensıasynyń sulbasy qalanǵanyn erekshe atap ótti. Elshiniń aıtýynsha, ol kezde qoıylǵan talap ta naqty bolatyn. Ótkeni onda keler samıtke deıin osy qujat tolyǵymen aıaqtalýy shart delingen edi.
Forýmǵa TMD jáne Kaspıı mańy elderiniń memlekettik organ ókilderi, RF Federaldyq jınalysynyń depýtattary, sheteldik elshiler, ǵalymdar men sarapshylar qatysty.
Forým qatysýshylary kómirsýlar men mıneraldy shıkizattardy óndirý jáne ony shetel naryǵyna tasymaldaýdy uıymdastyrý salasynda yntymaqtasý formalaryn damytý, ekologıa, elektroenergıa, kólik ınfraqurylymynyń qurylysy, hımıalyq ónerkásip, mashına qurastyrý, metalýrgıa, qarjy sektory, saqtandyrý jáne aýyl sharýashylyǵy salasynda birlesken jobalardy júzege asyrý máselelerintalqylady.
